اقساي وزەنىندەگى سالىنىپ جاتقان سۋ دايىنداۋ ستانسياسى ناۋرىزباي اۋدانىنىڭ 100 مىڭ تۇرعىنى ءۇشىن سۋ تاپشىلىعى ماسەلەسىن شەشەدى
ناۋرىزباي اۋدانىنداعى سۋ تاپشىلىعىن جويۋ ماقساتىندا قۋاتى تاۋلىگىنە 22 مىڭ م³ بولاتىن سۋ دايىنداۋ ستانسياسىنىڭ قۇرىلىسى جۇرگىزىلۋدە. ستانسيا 100 مىڭ ادامدى سۋمەن قامتاماسىز ەتەدى. بۇل تۋرالى شجق «الماتى سۋ» مكك باس ديرەكتورى ءىلياس قازييەۆ وڭىرلىك كوممۋنيكاسيالار قىزمەتىندە وتكەن بريفينگتە مالىمدەدى، دەپ حابارلايدى aqshamnews.kz
قۇرىلىس جۇمىستارىن بيىل قازان ايىندا اياقتاۋ جوسپارلانىپ وتىر. سونىمەن قاتار، بيىل مامىر ايىندا بۇعان دەيىن سالىنعان قارعالى سۇزگى ستانسياسىندا ىسكە قوسۋ-رەتتەۋ جۇمىستارى اياقتالادى.
«سۋ تازارتۋ نىسانىنىڭ جۇمىس ىستەۋى ءۇشىن قاجەتتى تەحنيكالىق كارىز كوللەكتورىنىڭ قۇرىلىسى قاتار جۇرگىزىلۋدە. بۇل باستاپقىدا ستانسيا جوباسىنا ەنگىزىلمەگەن بولاتىن»، – دەدى سپيكەر.
اتالعان كوللەكتوردىڭ قۇرىلىسى وسى جىلدىڭ ماۋسىمىندا اياقتالعان سوڭ ستانسيانى ىسكە قوسۋعا بولادى. بۇل قارعالى وزەنىنەن الىناتىن سۋدى تازالاپ، حالىققا جەتكىزۋگە مۇمكىندىك بەرەدى.
وسى جوبالاردىڭ جۇزەگە اسىرىلۋى ناۋرىزباي اۋدانى تۇرعىندارىن، ونىڭ ىشىندە قاراعايلى، قۇرامىس، تاۋسامالى، تاستىبۇلاق شاعىن اۋداندارىنداعى 50 مىڭ ادامدى ساپالى جانە ۇزدىكسىز سۋمەن قامتۋعا جول اشادى.
سونىمەن قاتار، قالانىڭ باتىس بولىگىندە ءوسىپ كەلە جاتقان سۇرانىستى قامتاماسىز ەتۋ ماقساتىندا قۋاتى تاۋلىگىنە 43 مىڭ م³ بولاتىن «بارلىق» سۋ جيناعىش جوبالانۋدا.