الماتى وڭىرلىك كوممۋنيكاسيالار قىزمەتىنىڭ الاڭىندا حالىقارالىق بالالاردى قورعاۋ كۇنىنە وراي ۇيىمداستىرىلعان «بالا قاۋىپسىزدىگى – باستى نازاردا» ءىس-شارالار كەشەنىنە ارنالعان باسپا ءسوز كونفەرەنسياسى ءوتتى.
شارا تۋرالى الماتى قالاسى توتەنشە جاعدايلار دەپارتامەنتىنىڭ مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆ باياندادى، دەپ حابارلايدى aqshamnews.kz.
ءىس-شارانىڭ اياسىندا قوعامدىق ورىنداردا، ب ا ق پەن الەۋمەتتىك جەلىلەرگە جاريالانعان 724 اقپاراتتىق ماتەريال جارىق كوردى. اتا-انالارى مەن بالالاردى قوسىپ ەسەپتەگەندە، ول ماتەريال 14 987 ادامدى قامتىعان.
تج جونىندەگى دەپارتامەنتتىڭ اقپاراتىنا قاراعاندا، مەملەكەت باسشىسىنىڭ IV ۇلتتىق قۇرىلتايدا «قازاقستان بالالارى» اتتى باعدارلاما ازىرلەۋدى تاپسىرعانىنا بايلانىستى، بالالارعا قاۋىپسىزدىكتىڭ العىشارتتارىن ۇيرەتىپ، ءورت ءسوندىرۋشى مەن قۇتقارۋشى ماماندىعىنا قۇرمەتپەن قاراۋدى وقىتاتىن اۋقىمدى ءىس-شارالار بولىپ وتكەن.
29 مامىر كۇنى مەدەۋ اۋدانى اكىمدىگى، رەسپۋبليكالىق جەدەل-قۇتقارۋ جاساعى جانە ق ر تجم توتەنشە مەديسينا ورتالىعىنىڭ قولداۋىمەن 28 گۆاردياشى-پانفيلوۆشىلار ساياباعىندا وتكەن اۋقىمدى ءىس-شاراعا 500 بالا قاتىستى. بالالار ءورت ءسوندىرۋ مەن قۇتقارۋ تەحنيكالارىن كورىپ، كينولوگيالىق قىزمەتتىڭ جۇمىسىمەن تانىستى. سونىمەن قاتار، العاشقى مەديسينالىق كومەك كورسەتۋ جانە توتەنشە جاعدايلار كەزىندەگى مىنەز-قۇلىق ەرەجەلەرى بويىنشا شەبەرلىك ساعاتتارى ءوتتى.
ءىس-شارا اياسىندا «قۇتقارۋشىلار مەن ءورت سوندىرۋشىلەر بالاردىڭ كوزىمەن» اتتى سۋرەت بايقاۋى ۇيىمداستىرىلىپ، جەڭىمپازدار ماراپاتتالىپ، سىيلىقتار تابىستالدى. بۇل بايقاۋعا بالالار ەرەكشە ىقىلاسپەن قاتىستى.
مەرەكەلىك كوڭىل كۇيدى انيماتورلار مەن قالانىڭ سيمۆولى بارىس قولدادى. سونىمەن بىرگە، ق ر تج ءمينيسترىنىڭ بەينەقۇتتىقتاۋى مەن قاۋىپسىزدىك تاقىرىبىنداعى بەينەروليكتەر كورسەتىلدى.
الەۋمەتتىك وسال ساناتتاعى بالالار دا نازاردان تىس قالمادى. 26 مامىردا تجد قىزمەتكەرلەرى SOS Children’s Village Almaty بالالار اۋىلىندا «قاۋىپسىزدىك شەكاراسىز» اتتى كوشپەلى ءىس-شارا وتكىزدى.
«ءىس-شارا بارىسىندا بالالارعا ءورت كەزىندەگى ەۆاكۋاسيا ءتارتىبى ءتۇسىندىرىلىپ، ءورت ءسوندىرۋ تەحنيكالارى مەن جابدىقتارى كورسەتىلدى. سونىمەن قاتار، ارناۋلى كيىمدى كيۋدەن جارىس ۇيىمداستىرىلىپ، العاشقى كومەك كورسەتۋ مەن سۋداعى قاۋىپسىزدىك ەرەجەلەرى بويىنشا ساباق ءوتتى»، – دەدى، ەركەبۇلان جۇماتايەۆ.
مەرەكە قۋىرشاق تەاترىنىڭ قويىلىمىمەن، ماراپاتتار مەن سىيلىقتار تابىستاۋمەن اياقتالدى.
سونىمەن قاتار، پەدياتريا جانە بالالار حيرۋرگياسى عىلىمي ورتالىعىندا ەمدەلىپ جاتقان بۇلدىرشىندەرگە ارناپ تا مەرەكەلىك باعدارلامالار ۇيىمداستىرىلدى. ال بوستاندىق اۋدانىنىڭ تج باسقارماسى رەسپۋبليكالىق سپورت كوللەدجى بازاسىندا بالالارعا قالاي ءجۇزۋ كەرەكتىگىن ۇيرەتەتىن ءدارىس وتكىزدى.
دەپارتامەنتتەگىلەر مۇنداي ءىس-شارالار بالالاردىڭ كوزىن اشىپ، ولار وقىس وقيعا كەزىندە قاۋىپسىزدىك ماسەلەسىنە جاۋاپتىراق قاراۋدى ۇيرەنەتىنىن ايتتى.