الماتى اكىمى دارحان ساتىبالدى الاتاۋ اۋدانىندا جۇمىس ساپارىمەن بولدى. قالا اكىمى قاراسۋ شاعىن اۋدانىنداعى سكۆەرءدىڭ، بورالداي، راحات-مادەنيەت شاعىن اۋداندارىنداعى تاراتۋ جەلىلەرىنىڭ، اقبۇلاق شاعىن اۋدانىنداعى جايلى مەكتەپتىڭ قۇرىلىسىمەن، سونداي-اق مومىش ۇلى كوشەسىندەگى جاسىل ايماقتىڭ اباتتاندىرىلۋىمەن تانىستى، دەپ حابارلايدى aqshamnews.kz
العاشقى بارعان نىسان قاراسۋ وزەنى جانىنداعى الاڭى 12 مىڭ شارشى مەتر بولاتىن سكۆەر بولدى. جوبا اياسىندا كوگالداندىرۋ، امفيتەاتردى، ارىق وتكەلىن، ارت-نىسانداردى ورناتۋ، سونداي-اق اۆتوماتتى سۋارۋ جانە جارىقتاندىرۋ جۇيەلەرى بويىنشا جۇمىستار جۇرگىزىلۋدە. الاتاۋ اۋدانىنىڭ اكىمى تالعات مايلىبايەۆ بايانداعانداي، اباتتاندىرۋ جوباسىن ىسكە اسىرۋ كەزىندە تابيعي رەلەفتى ساقتاۋعا جانە جاعالاۋ ايماعىنىڭ ەكولوگيالىق جاعدايىن جاقسارتۋعا ەرەكشە نازار اۋدارىلدى. مۇندا باسپالداقتار،پاراپەتتەر، ورىندىقتار مەن ۋرنالار ورناتۋ جوسپارلانۋدا. جۇمىستاردىڭ اياقتالۋى اعىمداعى جىلدىڭ شىلدەسىنە جوسپارلانعان.
جۇمىس ساپارى اياسىندا دارحان ساتىبالدى «بورالداي» جانە «راحات-مادەنيەت» شاعىن اۋداندارىنداعى سۋ قۇبىرى مەن كارىزدىڭ تاراتۋ جەلىلەرى قۇرىلىسىنىڭ بارىسىمەن تانىستى. وسى جوبالار بويىنشا جۇمىستار بەكىتىلگەن كەستەلەرگە سايكەس ورىندالۋدا. جوبا بويىنشا «بورالدايدا» 4 مىڭعا جۋىق تۇرعىندى قامتيتىن 76 شاقىرىمنان استام ينجەنەرلىك جەلىلەردى سالۋ قاراستىرىلعان. قۇرىلىس - مونتاج جۇمىستارىن اياقتاۋ 2025 جىلدىڭ قاراشا ايىنا جوسپارلانعان. «راحات-مادەنيەتتە» جوبانى ىسكە اسىرۋ ناتيجەسىندە (جوسپارلانعان كۇنى - اعىمداعى جىلعى 10 جەلتوقسان) اۋداننىڭ 14 مىڭنان استام تۇرعىنى ورتالىقتاندىرىلعان سۋمەن جانە كارىزبەن قامتاماسىز ەتىلەتىن بولادى. مۇندا تۇرعىنداردىڭ ءوتىنىشى بويىنشا ويىن الاڭى پايدا بولادى.
قالا اكىمى جۇمىس ساپارى بارىسىندا تاعى ءبىر جەردە – اقبۇلاق شاعىن اۋدانىنداعى «جايلى مەكتەپ» ۇلتتىق جوباسى اياسىندا سالىنىپ جاتقان 1500 ورىندىق جاڭا مەكتەپ قۇرىلىسىندا بولدى. نىسان بۇزىلعان №154 مەكتەپتىڭ ورنىنا 2024 جىلدىڭ قىركۇيەگىنەن باستاپ سالىنۋدا. بۇگىندە جۇمىستىڭ 90%-ى اياقتالدى. مەكتەپتىڭ اشىلۋى جاڭا وقۋ جىلىنىڭ باستالۋىنا جوسپارلانعان.
نىسانعا بارعان كەزدە دارحان ساتىبالدى ورىندالعان جۇمىستار ساپاسىنداعى كەمشىلىكتەردى كورسەتىپ، سىرتقى اباتتاندىرۋدى، سونداي-اق مەكتەپ ىشىندەگى ارلەۋ جۇمىستارىن جاقسارتۋدى تاپسىردى.
سونداي-اق، قالا اكىمىنە مومىش ۇلى كوشەسى بويىنداعى الاڭى 4،5 مىڭ شارشى مەتر بولاتىن جاسىل ايماقتى اباتتاندىرۋ جوباسى كورسەتىلدى. جوبادا كوگالداندىرىلعان، تروتۋار پليتكالارى، كىشى ساۋلەت پىشىندەرى، ارت- نىساندار ورناتىلعان ءارى جارىقتاندىرىلعان جايلى قوعامدىق كەڭىستىك جاساۋ قاراستىرىلعان. دەمالىس جانە سىنىپتان تىس جۇمىستارعا ارنالعان ايماقتاردى ۇيىمداستىرۋ جوسپارلانۋدا. جۇمىستاردىڭ اياقتالۋى وسى جىلدىڭ ماۋسىم ايىنا جوسپارلانعان. اكىمنىڭ تاپسىرماسى بويىنشا بارلىق جۇمىستار ءبىرىڭعاي ديزاين-كودقا سايكەس بولۋى ءتيىس.
جۇمىس ساپارىنىڭ قورىتىندىسى بويىنشا دارحان ساتىبالدى بارلىق باستالعان جوبالار اياقتالاتىنىن اتاپ ءوتتى جانە ولاردىڭ ساپالى ورىندالۋىن قامتاماسىز ەتۋدى تاپسىردى. قالا اكىمى جاڭا جانە قارقىندى دامىپ كەلە جاتقان شاعىن اۋدانداردا جايلى قوعامدىق كەڭىستىكتەردى قۇرۋ، ولاردى اباتتاندىرۋ، ينجەنەرلىك ينفراقۇرىلىمدى دامىتۋ جانە زاماناۋي مەكتەپتەر سالۋ الماتى اكىمدىگى جۇمىسىنىڭ باسىم باعىتتارى ەكەنىن اتاپ ءوتتى.
