1 مامىردان باستاپ الماتىدا سۋبۇرقاقتار ماۋسىمى رەسمي تۇردە باستالادى. ولار كۇن سايىن ساعات 08:00-دەن 23:00-گە دەيىن جۇمىس ىستەيدى. ولاردىڭ جۇمىسى 1 قازانعا دەيىن سوزىلادى. بۇل رەتتە، قولدانىستاعى ەرەجەلەرگە سايكەس +5°C تومەن تەمپەراتۋرادا سۋبۇرقاقتاردى پايدالانۋعا تىيىم سالىنادى، دەپ حابارلايدى aqshamnews.kz
اعىمداعى ماۋسىمدا 56 كوممۋنالدىق سۋبۇرقاق كەشەنى ىسكە قوسىلادى، ونىڭ 11ء-ى «قۇرعاق». سۋبۇرقاقتارعا تەحنيكالىق قىزمەت كورسەتۋ مەن سانيتارلىق جاعدايدى الماتى قالاسى قوعامدىق كەڭىستىكتەردى دامىتۋ باسقارماسىنىڭ ۆەدومستۆولىق باعىنىستى ۇيىمى - «Eco Almaty» ج ش س قامتاماسىز ەتەدى.
كوكتەمگى كەزەڭنىڭ باستالۋىمەن ماماندار سۋبۇرقاقتاردى كەشەندى دايىنداۋدى جۇرگىزدى: توستاعاندار مەن ىرگەلەس اۋماقتى تازارتۋ، حلور مەن مىس سۋلفاتىن پايدالانىپ سۋدى زارارسىزداندىرۋ، جابدىقتى بوياۋ جانە جوندەۋ، سونداي-اق بارلىق ينجەنەرلىك جۇيەلەردى تەكسەرۋ. مۇنداي شارالار قالالىق سۋبۇرقاقتاردىڭ ءقاۋىپسىز جانە تۇراقتى جۇمىسىن قامتاماسىز ەتۋگە مۇمكىندىك بەرەدى.
ەستەرىڭىزگە سالا كەتەيىك، اعىمداعى جىلدىڭ ءساۋىر ايىندا الماتىدا ءتورت ورتالىق سۋبۇرقاقتى: اكىمدىك عيماراتىنىڭ جانىنداعى شىعىس جانە باتىس سۋبۇرقاقتاردى، رەسپۋبليكا الاڭىنداعى سۋبۇرقاقتى جانە ع.مۇسىرەپوۆ اتىنداعى تەاتردىڭ جانىنداعى سۋبۇرقاقتى اۋقىمدى قايتا جاڭارتۋ باستالدى. بۇل نىسانداردا بولشەكتەۋ جۇمىستارى جۇرگىزىلۋدە. ىرگەلەس اۋماقتاردى قايتا قۇرۋ مەن اباتتاندىرۋدى 2025 جىلدىڭ قازان ايىندا تولىق اياقتاۋ جوسپارلانۋدا. جاڭارتۋدان كەيىن بۇل سۋبۇرقاقتار قالا تۇرعىندارى مەن مەگاپوليس قوناقتارى ءۇشىن زاماناۋي، ءقاۋىپسىز جانە جايلى دەمالىس ورىندارىنا اينالادى.
قالانىڭ التى سۋبۇرقاعىنا اعىمداعى جوندەۋ جۇرگىزۋ ماسەلەسى قوسىمشا قاراستىرىلۋدا.
الماتى سۋبۇرقاقتارى-بۇل ينجەنەرلىك قۇرىلىستار عانا ەمەس، سونىمەن قاتار قالالىق بىرەگەيلىك پەن كورنەكى مادەنيەتتىڭ ماڭىزدى ەلەمەنتتەرى. ولاردى قالپىنا كەلتىرۋ جانە جاڭارتۋ — ەستەتيكالىق، جايلى جانە ءقاۋىپسىز قوعامدىق كەڭىستىكتى قۇرۋعا جاسالعان قادام.