قالاداعى 316 407 ادام ەكپە الدى، بۇل شاھار حالقىنىڭ 16%-ىن قۇرايدى.
قالا دارىگەرلەرى الماتىدا ەكپە شارالارى قالاي ءجۇرىپ جاتقانىن بايانداپ بەردى، دەپ حابارلايدى Almaty-akshamy.kz.
حالىقتى كۆي-عا قارسى ۆاكسيناسيالاۋ قىزمەت بابىندا كوپشىلىكپەن (مەديسينا قىزمەتكەرلەرى، ۋچاسكەلىك پوليسيا، اكىمدىك قىزمەتكەرلەرى، كوممۋنالدىق قىزمەت، قوعامدىق تاماقتانۋ، ساۋدا قىزمەتكەرلەرى) كۇندەلىكتى بايلانىستا بولاتىن مامانداردان باستالدى. بۇگىنگە دەيىن 316 407 ادام ۆاكسيناسيالاندى، بۇل قالا حالقىنىڭ 16%-ىن قۇرايدى جانە وعان قوسا اۋىرىپ جازىلعان ادامدار 5%، بارلىعىن قوسقاندا، قالا تۇرعىندارىنىڭ ۇجىمدىق يممۋنيتەتى 21%-دان استى.
كۆي سىرقاتىنىڭ اۋىرلىعى بويىنشا تاۋەكەل توبىنا جاتاتىن 60 جاستان اسقان ەكپە العاندار 32 758 ادامدى نەمەسە وسى جاس ساناتىنداعى ادامداردىڭ جالپى سانىنىڭ 12%-دان استامىن قۇرايدى. (قالانىڭ مەديسينالىق ۇيىمدارىندا، مەكتەپتەردە، مادەنيەت، سپورت نىساندارىندا، بازارلاردا جانە ساۋدا ويىن-ساۋىق ورتالىقتارىندا 211 ۆاكسيناسيالاۋ پۋنكتى جۇمىس ىستەيدى. ولاردىڭ سانىن ءارى قاراي 250-گە دەيىن كوبەيتۋگە بولادى. وسى جۇمىستارعا قۇرامىندا 1 257 مامانى بار 304 ەگۋ بريگاداسى جۇمىلدىرىلدى).
اۋرۋدىڭ تومەندەۋىنە شاعىن جانە ورتا بيزنەس نىساندارىندا ASHYQ جۇيەسىن ەنگىزۋ، مونيتورينگتىك توپتار تاراپىنان نىسانداردى جۇيەلى باقىلاۋ، كۆي-دىڭ بەلسەندى وشاقتارى بار كوپ پاتەرلى ۇيلەردىڭ قوعامدىق ورىندارىندا (كىرەبەرىستەر، باسپالداق ارالىقتارى، ليفتىلەر، بالالار ويىن الاڭدارى) پروفيلاكتيكالىق دەزينفەكسيا جۇمىستارىن جۇرگىزۋ وڭ اسەرىن تيگىزدى.
ASHYQ جوباسى الماتى قالاسىندا اقپان ايىنان باستاپ جۇزەگە اسىرىلۋدا. باستى مىندەتتەردىڭ ءبىرى - وڭ ناتيجەلى پتر تەستى بار تۇرعىنداردىڭ، سونداي-اق ولارمەن بايلانىستا بولعان ادامداردىڭ قوعامدىق ورىندارعا، ونىڭ ىشىندە كاسىپكەرلىك سۋبەكتىلەرىنە بارۋعا قولجەتىمدىلىگىن شەكتەۋ جانە سول ارقىلى 14 كۇندىك ءۇي كارانتينىن ساقتاۋ بولىپ تابىلادى. الماتى قالاسىندا ەنگىزىلگەن ساتتەن باستاپ ASHYQ موبيلدىك قوسىمشاسىنىڭ كومەگىمەن QR-كودپەن ءوز مارتەبەسىن سكانەرلەۋ ناتيجەلەرى بويىنشا ASHYQ جوباسى شاعىن جانە ورتا بيزنەس نىساندارىنا كىرۋگە كەلەسى تۇرعىندارعا جول بەرمەدى: 1235 تۇرعىندا قىزىل مارتەبە، 298 تۇرعىندا سارى مارتەبە راستالدى. ونىڭ ىشىندە وففلاين سكانەرلەگەن كەزدە – ASHYQ جوباسى وكىلدەرى جۇمىس ىستەيتىن كاسىپكەرلىك نىساندارعا كىرگەن كەزدە 551 تۇرعىننىڭ «قىزىل» مارتەبەسى، 131 ادامنىڭ «سارى» مارتەبەسى راستالدى. قالعاندارى ءوزىن-وزى باقىلاۋ ءۇشىن ونلاين رەجيمىندە جۇمىس ىستەيدى، وسىلايشا «كوك» مارتەبەسى بار كەلۋشىلەر اراسىندا كۆي اۋرۋىن جۇقتىرۋدى جانە تىركەۋدى بولدىرمايدى. سونداي-اق، ASHYQ جوباسى تۇرعىندارعا ءموبيلدى قوسىمشانىڭ كومەگىمەن ءۇي كارانتينىن بۇزباي، ءوز مارتەبەسىن «قاشىقتان» تەكسەرۋگە مۇمكىندىك بەرەدى. ينتەرنەتتەگى ادىسپەن 649 تۇرعىنعا قىزىل مارتەبە، ال 144 تۇرعىنعا سارى مارتەبە راستالدى.
اتالعان شارالار كەشەنىنىڭ ناتيجەسىندە كۆي بويىنشا تاۋلىكتىك ءوسىم 6 ەسەگە، مامىر ايىنىڭ باسىندا 1،2%-دان بۇگىنگى كۇنى 0،2%-عا دەيىن تومەندەدى. سوڭعى تاۋلىكتە الماتى قالاسىندا مامىر ايىنىڭ العاشقى كۇندەرىندەگى مالىمەتكە قاراعاندا 605-608 بولعان كورسەتكىشتەن 143-كە ازايعان.