ۆاكسيناسيا تۇماۋدىڭ الدىن الۋدىڭ ءتيىمدى ءادىسى بولىپ قالا بەرەدى. بۇل تۋرالى بۇگىن الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا الماتىداعى №36 قالالىق ەمحانانىڭ جالپى تاجىريبەلىك دارىگەرى راۋان نۇركەنوۆ ايتتى، - دەپ حابارلايدى almaty-akshamy.kz
جرۆي جانە تۇماۋ سانىنىڭ ارتقانى بايقالادى. دارىگەر مۇنى مەگاپوليستەگى حالىقتىڭ كوپتىگىمەن جانە ادامدار كوپ جينالاتىن ورىندارمەن ءتۇسىندىردى. سوندىقتان ۆيرۋستىق اۋرۋلار وتە تەز تارالادى. دارىگەردىڭ ايتۋىنشا، تۇماۋ ءالى دە بەلگىلى ءبىر ءقاۋىپ توندىرەدى.
«تۇماۋمەن اۋىرعاندار كوبەيىپ كەلەدى. تۇماۋدىڭ نەگىزگى شتاممدارىنا قارسى يممۋنيتەت بار. ءبىراق تۇماۋ شتامدارى جىل سايىن مۋتاسياعا ۇشىرايدى. جىل سايىن بىزگە تۇماۋدىڭ جاڭا شتاممدارى كەلەدى. سوندىقتان تۇماۋعا قارسى ۆاكسينا جىل سايىن وزگەرتىلىپ وتىرادى»، - دەدى ول.
ر.نۇركەنوۆتىڭ ايتۋىنشا، ۆيرۋستار اسىرەسە سوزىلمالى اۋرۋلارى بار ادامدار ءۇشىن ءقاۋىپتى.
«بىزگە كەلگەن ناۋقاستار اراسىندا اراسىندا جۇكتى ايەلدەر دە بار. 15-20 پايىز شاماسىندا. سايكەسىنشە، ءقازىردىڭ وزىندە ماۋسىمدىق تۇماۋمەن اۋىرۋ ءجۇرىپ جاتىر. جۇكتى ايەلدەر تۇماۋمەن جانە جرۆي-مەن اۋىرعان كەزدە ولارعا پروفيلاكتيكالىق جانە سيمپتوماتيكالىق ەم كورسەتىلەدى، سونىڭ ارقاسىندا ولاردىڭ جاعدايىنىڭ جاقسارۋى بايقالادى. انتيبيوتيكتەر، ەگەر ءقازىردىڭ وزىندە اسقىنۋلار بولسا، كورسەتكىشتەر بويىنشا عانا تاعايىندالادى. ەگدە جاستاعى ادامداردا اسقىنۋلار ءجيى كەزدەسەدى، ويتكەنى ولاردىڭ سوزىلمالى اۋرۋلارى بار. ال بالالاردىڭ يممۋنيتەتى تولىق قالىپتاسپاعان»، - دەدى سپيكەر.
اۋرۋدىڭ الدىن الۋ ءۇشىن دارىگەر يممۋنيتەتتى كوتەرىپ، ادامدار كوپ باراتىن جەرلەردەن ساق بولۋ جانە دەنساۋلىقتى كۇتۋ كەرەك دەگەن كەڭەس بەردى.
ر.نۇركەنوۆ دەنساۋلىققا كۇتىممەن قاراپ، يممۋنيتەتتى كوتەرىپ، سپورتپەن شۇعىلدانۋعا كەڭەس بەردى.