جابىرلەنۋشىلەر 1،8 ملن دوللارىنان جانە 630 ملن تەڭگەسىنەن ايىرىلعان.
الماتىدا The Finiko قارجى پيراميداسى فيليالىنىڭ باسشىلىعىنا قاتىستى سوتقا دەيىنگى تەرگەۋ ءجۇرىپ جاتىر، دەپ حابارلايدى Almaty-akshamy.kz
Finiko ۇيىمداستىرۋشىلارىنىڭ ۇستىنەن 300-دەن اسا ادام ارىزدانعان. شىعىن مولشەرى 1،8 ملن دوللارىن جانە 630 ملن تەڭگەنى قۇرادى.
«قارجى نارىعىن رەتتەۋ جانە دامىتۋ اگەنتتىگىنىڭ قورىتىندىسىنا سايكەس، Thefiniko – سيمۋلياتور. قاتىسۋشىلار بۇل باعدارلامانى ساۋدا مەن ينۆەستيسيالاۋ الاڭى دەپ ساناپ، اقشا سالعان. ال كومپانيانىڭ ءوزى الەمدىك قور بيرجالارىندا تىركەلمەگەن»، - دەپ حابارلايدى قارجى مونيتورينگى اگەنتتىگى.
قىلمىستىق ءىس بويىنشا ءۇش ادام قاماۋعا الىندى. باسقالارىنىڭ قارجى پيراميداسىنا قاتىسى بار-جوعى انىقتالىپ جاتىر.
اگەنتتىك ازاماتتاردى قىراعى بولۋعا جانە اقشاسىن كۇماندى قارجى ۇيىمدارىنا سالماۋعا شاقىرادى.
The Finiko پيراميداسىنا الدانىپ قالعان ازاماتتار اگەنتتىكتىڭ سەنىم تەلەفونىنا – +7 7172 708 478 حابارلاسا الادى.