بۇل تۋرالى وڭىرلىك كوممۋنيكاسيالار قىزمەتى الاڭىندا «قازسەلدەنقورعاۋ» مم الماتى فيليالىنىڭ وكىلى سامات داۋلەنكانوۆ ايتتى.
الماتىدا حالىق پەن نىسانداردى قورعاۋ ماقساتىندا 7 رەت قار ءتۇسىرىلدى. سونداي-اق، قار كوشكىنىنىڭ ءقاۋىپتى كەزەڭى باستالعالى بەرى تاۋدان 35 مارتە (39 100 تەكشە مەتر) قار تۇسكەن، دەپ حابارلايدى Almaty-akshamy.kz
سپيكەردىڭ مالىمەتىنشە، پروفيلاكتيكالىق ماقساتتا تۇسىرىلگەن قاردىڭ جالپى اۋدانى 2 460 تەكشە مەتردى قۇرادى.
«بۇگىن تاڭعى ساعات 07.00-دەگى جاعداي بويىنشا كىشى الماتى وزەنى الابىندا قار جامىلعىسىنىڭ بيىكتىگى: مەدەۋ بوگەتى اۋدانىندا – 36 سم، مىڭجىلقى – 50 سم، قوتىربۇلاق وزەنى الابىندا 69-120 سم. ۇلكەن الماتى وزەنى الابى بويىنشا قار جامىلعىسىنىڭ بيىكتىگى 9-دان 78 سم-گە دەيىن. اقساي جانە قارعالى وزەنى الابىندا قار جامىلعىسىنىڭ بيىكتىگى – 4 سم، اقساي-اقجار باقىلاۋ بەكەتىندە – 6 سم»، – دەدى سامات داۋلەنكانوۆ.
ول مەتەورولوگيالىق، قار كوشكىنى جاعدايى وزگەرگەن جاعدايدا جانە قار تۇرىندە قاتتى جاۋىن-شاشىن كەزىندە قار كوشكىنى ءجۇرۋى مۇمكىن ەكەنىن ايتتى.
«قار كوشكىنىنىڭ الدىن الۋ ءۇشىن ورتالىق اپپاراتتىڭ ۇسىنىسىمەن بلوكپوستار قويىلىپ جاتىر. «مەدەۋ-شىمبۇلاق» جانە «الماتى-ۇاك» اۆتوجولدارىنا، باسقا دا ءقاۋىپتى ايماقتارداعى جولدار قار كوشكىنى ءقاۋپى جاعدايىندا جابىلىپ، بلوكپوست قويىلىپ جاتىر. «قازسەلدەنقورعاۋ» مم الماتى قالالىق پايدالانۋ-تەحنيكالىق باسقارماسىندا 32 ادام، 21 ارنايى تەحنيكا دايىن تۇر»، – دەدى سپيكەر.
سونداي-اق ونىڭ مالىمەتىنشە، قازىرگى ۋاقىتتا قىزمەت كورسەتۋ ايماعى بويىنشا توپىراقتىڭ قاتۋى: ۇلكەن الماتى وزەنى الابىندا – 10 سم، كىشى الماتى وزەنى الابىندا – 28 سم، اقساي وزەنى الابىندا – 20 سم، قارعالى وزەنى الابىندا – 18 سم.