الماتى تاۋلارىندا قار كوشكىنى ءجۇرۋى مۇمكىن

ءمالىم بولعانداي، الماتى وبلىسىنىڭ تاۋلارىندا 2024 جىلدىڭ 3 قاڭتارىنا دەيىن كوشكىن ءقاۋپى ساقتالادى. وسىعان وراي، قۇتقارۋشىلار ازاماتتاردان، تۋريستەر مەن دەمالۋشىلاردان قار كوشكىنىن تۋدىرۋى مۇمكىن بولعاندىقتان قارلى بەتكەيلەرگە شىقپاۋدى، سونداي-اق تاۋلى جەرلەردە بارلىق قاۋىپسىزدىك شارالارىن ساقتاۋدى سۇرادى، دەپ حابارلايدى Almaty-akshamy.kz.

«تاۋلاردا قار دەڭگەيىنىڭ ەداۋىر وسۋىنە بايلانىستى (25 سم – دەن ارتىق) - الماتى وبىلىسىنىڭ اۋماعىندا قار كوشكىنى ءقاۋپى جوعارى. جوعارىدا ايتىلعانداردىڭ نەگىزىندە تاۋلارعا بارۋدان باس تارتۋدى، تاۋلاردىڭ قارلى بەتكەيلەرىنە شىقپاۋدى ۇسىنامىز»، - دەپ حابارلادى «قازسەلدەنقورعاۋ» مم ىلە-الاتاۋ فيليالى.

«ەگەر ءسىز قانداي دا ءبىر سەبەپتەرمەن تاۋلى جەردە بولساڭىز، قار كوشكىنىن تۋدىرماس ءۇشىن تاۋلاردىڭ قارلى بەتكەيلەرىنە بارماڭىز. ەگەر سىزگە كومەك قاجەت بولسا، 112 نومىرىنە دەرەۋ قوڭىراۋ شالىڭىز» - دەلىنەدى الماتى وبلىسى تجد حابارلاماسىندا.

ايتا كەتەيىك، الماتى وبلىسىنىڭ اۋماعىندا ىلە-الاتاۋ تاۋ جوتاسىنىڭ وڭتۇستىك بەتكەيىندە ەڭبەكشىقازاق، تالعار جانە قاراساي اۋداندارىندا 55 كوشكىن ءقاۋپى بار ۋچاسكە بار. نەگىزىنەن قار كوشكىنىنىڭ ءتۇسۋى تەمپەراتۋرا فونىنىڭ جوعارىلاۋىنا جانە جاڭبىر مەن قار تۇرىندە مول جاۋىن-شاشىننىڭ تۇسۋىنە بايلانىستى بولادى.