الماتى تاۋلارىندا قالىپ قويعان قىز بەن جىگىت تابىلدى

قۇتقارۋشىلار ولاردى بيىكتىگى 3 400 مەتر بولاتىن راحات شىڭىنان تاپقان. 

رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى الماتى تاۋلارىندا قالىپ قويعان قىز بەن جىگىتتى تاپتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

رەسپۋبليكالىق جەتەل قۇتقارۋ جاساعى باسپا ءسوز قىزمەتىنىڭ مالىمەتىنشە، 20 شىلدە كۇنى تالعار اۋدانىنداعى «اقبۇلاق» تاۋ كۋرورتىنىڭ جانىندا 19 جاستاعى جىگىت پەن 16 جاستاعى قىز راحات شىڭىنا جاياۋ كوتەرىلگەن.

«ولاردىڭ سەرۋەنى تۇستە باستالعان، الايدا، ماقساتتى جەرىنە جەتكەندە، قاراڭعى ءتۇسىپ، كەش باتقان. جاستار ءوز كۇشىن ەسەپتەمەگەنىن ءتۇسىندى، الايدا تومەن ءتۇسۋ ولارعا قيىن بولدى. امالسىز كومەككە جۇگىندى. ساعات 22:15 كەزىندە 7 قۇتقارۋشى، ونىڭ ىشىندە كينولوگيالىق توپ جولعا شىقتى»، - دەپ حابارلادى جاساقتان.

تۇنگى ۋاقىتتا ىزدەستىرۋ جۇمىسى كۇردەلەنە تۇسكەن. 2،5 ساعاتتان سوڭ قۇتقارۋشىلار جاستاردى بيىكتىگى 3 400 مەتر بولاتىن راحات شىڭىنان تاپقان.

«قۇتقارۋشىلار ولارعا بۇكىل قاجەتتى كومەكتى كورسەتىپ، تاڭعى ساعات 04:00 شاماسىندا «اقبۇلاق» بازاسىنا جاساق كولىگىمەن جەتكىزدى. سونداي-اق، جاستارعا ءتۇسىندىرۋ جۇمىسى جۇرگىزىلدى»،- دەدى ۆەدومستۆودان.