الماتى تاۋلارىندا مۇزدىقتار ەرىپ جاتقان جوق – تجد

اەروۆيزۋالدى شولۋ تەڭىز دەڭگەيىنەن 800-4200 مەتر بيىكتىكتە ءوتتى

الماتى تاۋلارىندا مۇزدىقتاردىڭ ەرۋ پروسەسى بايقالمايدى. بۇل تۋرالى قالا ماڭىنداعى تاۋلارعا اەروۆيزۋالدى شولۋ جۇرگىزۋ بارىسىندا بەلگىلى بولدى، دەپ حابارلايدى Almaty-akshamy.kz ءتجد-نىڭ باسپا ءسوز قىزمەتىنە سىلتەمە جاساپ.

الماتى قالاسىنىڭ توتەنشە جاعدايلار دەپارتامەنتىنەن ءمالىم ەتكەندەي، الماتى قالالىق تجد، «قازسەلدەنقورعاۋ» مم، «قازگيدرومەت» رمك الماتى قالاسى بويىنشا فيليالىنىڭ ماماندارى شاھار ماڭىنداعى تاۋلاردى كەشەندى باعالاۋ ماقساتىندا اەروۆيزۋالدى تەكسەرۋ جۇرگىزدى.

«تاۋلاردا مۇزدىقتاردىڭ ابلياسيا (ەرۋ) پروسەسى بايقالمايدى. بارلىق مورەنالىق كولدەر قىسقى رەجيمدە بولۋىنا بايلانىستى قالا تۇرعىندارى مەن ينفراقۇرىلىمىنا ءقاۋىپ توندىرمەيدى»، - دەلىنگەن حابارلامادا.

ايتا كەتەيىك، اەروۆيزۋالدى شولۋ تەڭىز دەڭگەيىنەن 800-4200 مەتر بيىكتىكتە ءوتتى. ىلە الاتاۋى جوتاسى وزەندەرىنىڭ باسسەيندەرى بويىنشا اقسايدان تۇرگەنگە دەيىنگى بيىك تاۋلى مورەنالىق كولدەر مەن مۇزدىقتاردىڭ، سەل ويىقتارى مەن وشاقتارىنىڭ جاي-كۇيى زەرتتەلدى.

الماتى قالالىق تجد تاۋلى جەرلەردە قار كوشكىنىنىڭ بايقالۋىنا بايلانىستى ازاماتتارعا تاۋ باۋرايلارىنا شىقپاۋدى ەسكەرتتى.