«اقىلدى قالا» قۇرۋ: شەنچجەن قالاسى مەرياسىنان دەلەگاسيا الماتىنىڭ دامۋ ورتالىعىنا باردى
الماتى قالاسىن دامىتۋ ورتالىعىنا شەنچجەن قالاسى مەرياسىنان دەلەگاسيا كەلىپ، قالالار اراسىنداعى سيفرلىق ترانسفورماسيا جانە «اقىلدى» قالالاردى دامىتۋ سالاسىنداعى ىنتىماقتاستىقتى نىعايتۋ ماقساتىندا كەزدەسۋ وتكىزدى، دەپ حابارلايدى aqshamnews.kz
Shenzhen Urban Transportation Planning and Design Research Center Co (SUTPC) كومپانياسىنىڭ ديرەكتورى يان چۋانۆەننىڭ ايتۋىنشا، سوڭعى جىلدارى شەنچجەن باسشىلىعى «اقىلدى» قالالاردى دامىتۋ جانە قۇرۋعا باسا نازار اۋدارىپ كەلەدى. SUTPC وسى سالاداعى جەتەكشى كومپانيا بولىپ تابىلادى جانە «سمارت سيتي» تۇجىرىمداماسى اياسىندا عىلىم مەن تەحنولوگيا سالاسىنداعى كوپتەگەن ماراپات يەلەنىپ، 300-دەن اسا ونەرتابىسقا پاتەنت العان.
بۇگىندە SUTPC جوبالارىنا سيفرلىق ەگىزدەردى، بۇلتتى جەلىلەردىڭ سيفرلىق پلاتفورمالارىن، ازاماتتارعا مەملەكەتتىك قىزمەتتىڭ سان ءتۇرىن ۇسىناتىن i-Shenzhen قوسىمشاسىن ازىرلەۋ؛ سونداي-اق Big data مەن جاساندى ينتەللەكتتى قولدانا وتىرىپ، ءتۇرلى قالالىق جۇيەلەردى مودەلدەۋ، دامىتۋ جانە بىرىكتىرۋ كىرەدى. بۇل باعىتتاردى دامىتۋ ەكونوميكالىق ءوسۋدى، ەنەرگيا تۇتىنۋدى جانە قۇرىلىس شىعىندارىن ازايتۋدى، قوعامدىق قاۋىپسىزدىكتى ارتتىرۋدى جانە توتەنشە جاعدايعا قالالىق اكىمشىلىكتىڭ ارەكەت ەتۋ جىلدامدىعىن ارتتىرۋعا ىقپال ەتەدى. يان چۋانۆەن شەنچجەندەگى توتەنشە جاعدايلارعا دەن قويۋ جىلدامدىعى 30%، ەنەرگيا تۇتىنۋ كولەمى 10% تومەندەگەنىن، ال قۇرىلىس شىعىندارى 30% ازايعانىن اتاپ ءوتتى.
الماتى قالاسى سيفرلاندىرۋ باسقارماسىنىڭ باسشىسى ولجاس جاڭابەك ارىپتەستەرىنە الماتى قالاسىن دامىتۋ ورتالىعىمەن، قالا اكىمدىگىنىڭ جوبالىق كەڭسەسىمەن جانە باسقا دا ءتيىستى باسقارمالارمەن بىرلەسىپ جۇزەگە اسىرىلىپ جاتقان قالالىق جوبالار تۋرالى ايتىپ بەردى. اتاپ ايتقاندا، بۇل الماتى قالاسىنىڭ بولاشاق سيفرلىق ەگىزىن قالىپتاستىرۋعا نەگىز بولاتىن ينجەنەرلىك جەلىلەردى تۇگەندەۋ جونىندەگى جوبا. تۇگەندەۋ بارىسىندا الىنعان دەرەكتەر كەيىن «اقىلدى» قالانىڭ قاڭقاسىنا اينالادى.
«الماتى قالاسىن دامىتۋ ورتالىعى» اق سيفرلاندىرۋ جونىندەگى باسقارۋشى ديرەكتورى رۋسلان بارماشيەۆ قوناقتارعا قالالىق اقپاراتتىق جۇيەلەردەن جانە اشىق دەرەككوزدەردەن الىنعان اقپاراتتى جيناقتاۋعا، وڭدەۋگە جانە تالداۋعا مۇمكىندىك بەرەتىن، باسقارۋشىلىق شەشىمدەر قابىلداۋعا كومەكتەسەتىن دەرەكتەر تالداماسىن قۇرۋعا، سونداي-اق قالا ءومىرىنىڭ بارلىق سالاسىن باقىلاۋعا ارنالعان باعدارلامالىق قۇرالداردىڭ پايدا بولۋىنا كومەكتەسەتىن «الماتى قالاسىنىڭ احۋالدىق ورتالىعى» اقپاراتتىق جۇيەسىن ۇسىندى.
ول قاۋىپسىزدىك، كولىك، ينكليۋزيا، ءبىلىم بەرۋ، دەنساۋلىق ساقتاۋ جانە ەكولوگيا بويىنشا مودۋلدەردى تانىستىردى. «ءقاۋىپسىز قالا» جانە الەۋمەتتىك سالاعا ەرەكشە نازار اۋدارىلدى.
شەنچجەن قالاسى مەرياسىنىڭ وكىلدەرى وسى جوبالارعا قىزىعۋشىلىق تانىتىپ، قولداۋ كورسەتۋگە جانە كەڭەس بەرۋگە دايىن ەكەنىن ءبىلدىردى.