الماتىدا بسپ، داۋن سيندرومى جانە اۋتيزممەن اۋىراتىن بالالار قازاق مەملەكەتتىك سيركى بازاسىندا تەگىن يپپوتەراپيا كۋرسىنان وتۋگە مۇمكىندىك الدى. بۇل جايىندا قالانىڭ مادەنيەت باسقارماسى مالىمدەدى.
قاراپايىم قيمىل-قوزعالىس جاساۋ جانە قورشاعان ورتامەن بايلانىس ورناتۋ قيىنعا سوعاتىن بالالار ءۇشىن جىلقىلارمەن قارىم-قاتىناس وڭالۋدىڭ جاڭا جولىن اشتى. كوپشىلىك ءۇشىن بۇل جاي عانا العاش رەت اتقا ءمىنۋ ەمەس، ەرەكشە ءارى قۋانىشتى ءسات بولدى.
يپپوتەراپيا – قيمىل-قوزعالىس قابىلەتىن، ۇيلەستىرۋدى، زەيىن مەن وزىنە دەگەن سەنىمدىلىكتى ارتتىرۋعا باعىتتالعان عىلىمي تۇرعىدان دالەلدەنگەن وڭالتۋ ءادىسى. سيركتەگى مۇنداي سەانس بالانىڭ ەسىندە ۇزاق ساقتالاتىن اسەرلى ءارى جىلى ەستەلىككە اينالادى.
ساباقتى ارنايى دايىندىقتان وتكەن كاسىبي يپپوتەراپيەۆت ماماندار جۇرگىزدى. قازمەمسيركتىڭ Nomad Stunts كومانداسى جاتتىعۋ ءۇشىن بالالارعا ارنايى ۇيرەتىلگەن جۋاس جىلقىلار اكەلدى.
«جىلقى بالانىڭ ءاربىر قيمىلىن، ىشكى كۇيىن اڭعارادى. ول بالا ءۇشىن دوسقا، سەرىككە اينالادى. ءبىز ءار بالانىڭ وزىنە دەگەن سەنىمدىلىكتى سەزىنۋىنە مۇمكىندىك بەرەتىن ءقاۋىپسىز ورتا جاسايمىز. ءبىزدىڭ سيرك قايىرىمدىلىق قويىلىمدارمەن شەكتەلمەي، يپپوتەراپيانى دا وتكىزەدى. بالالارمەن جۇمىس ىستەۋ ءبىز ءۇشىن ۇلكەن مارتەبە ءارى قۋانىش»، - دەدى سيرك ءارتيسى، Nomad Stunts كومانداسىنىڭ جەتەكشىسى قاناتبەك كۇنعوجينوۆ.
يپپوتەراپياعا العاش رەت قاتىسقان جەتى جاستاعى ءالىمنىڭ اناسى بۇل تاجىريبەنىڭ ۇلى ءۇشىن شىنايى سەرپىلىس بولعانىن ايتتى.
«ءالىم كىشكەنتاي كەزىنەن ادامدارمەن ارالاسۋدا، ەموسياسىن بىلدىرۋدە قيىندىق كورىپ كەلدى. العاشقى سەانس بولعانىنا قاراماستان، ول اتقا قۋانا ءمىنىپ، شەڭبەردى بىرنەشە رەت اينالدى. ونىڭ جۇزىندەگى كۇلكى مەن سەنىمدى قيمىل مۇنداي جاتتىعۋدىڭ قانشالىقتى ماڭىزدى ەكەنىن دالەلدەپ تۇر. بۇل – بالام ءۇشىن ناعىز سەرپىلىس. وسىنداي يگى ءىس-شارانى ۇيىمداستىرىپ، قاتىسۋ مۇمكىندىگىن بەرگەندەرىڭىزگە العىسىم شەكسىز»، – دەدى مەرۋەرت سارسەنعالييەۆا.
بالالار يپپوتەراپيا ساباقتارىنا «اردي» مۇمكىندىگى شەكتەۋلى بالالاردىڭ اتا-انالارىنىڭ قاۋىمداستىعى مەن الەۋمەتتىك قىزمەت كورسەتۋ ورتالىقتارى ارقىلى شاقىرىلادى. بۇگىنگە دەيىن الماتى سيركى بازاسىندا 40-قا جۋىق بالا تەگىن يپپوتەراپيا كۋرسىنان ءوتتى.