ەرتەگىنىڭ ەڭ جاس قاتىسۋشىسى 7 جاستا
الماتىداعى قازاق مەملەكەتتىك سيركىندە بۇگىننەن باستاپ «قار حانشايىمى» اتتى جاڭاجىلدىق قويىلىم حالىڭ كورەرمەنگە جول تارتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
قويىلىمدا بىرنەشە حالىقارالىق فەستيۆالداردىڭ جۇلدەگەرلەرى مەن سيرك كوللەدجىنىڭ ستۋدەنتتەرى ونەر كورسەتەدى. ەرتەگىنىڭ ەڭ جاس قاتىسۋشىسى 7 جاستاعى دانات دوسباتىروۆ. ول سيركتە ونەر كورسەتىپ جۇرگەن داناتوۆتار اۋلەتىنىڭ ءۇشىنشى بۋىنى.
قازاق مەملەكەتتىك سيركىنىڭ ديرەكتورى باقىت بوكەبايەۆ بيىل بالالار ءۇشىن ەرتەگى تاقىرىبىن ادەيى تاڭداعاندارىن جەتكىزدى.
«قار حانشايىمى» ەرتەگىسى بۇرىن كەڭ تاراعان، الايدا قازىرگى بالالار ونى ءجوندى بىلە بەرمەيدى. سونى ءبىز جاڭا قىرىنان بەرىپ وتىرمىز. ونىڭ ۇستىنە بالالار ەرتەڭگى كۇننەن جاقسىلىق كۇتەدى، سوندىقتان وسى ەرتەگىنى ادەيى تاڭدادىق، كەز كەلگەن ەرتەگى جاقسىلىقپەن اياقتالادى، ياعني جاس ۇرپاقتى ادامگەرشىلىككە تاربيەلەۋدە ماڭىزى زور»، - دەدى ول.
سونىمەن قاتار ول ءقازىر تەك سيركتەن بولەك دراماتۋرگيا، وپەرادا جاڭا قويىلىمداردى تاماشالاۋ قيىنعا سوعىپ وتىرعانىن جەتكىزدى. ويتكەنى جاڭا شىعارما جازىپ جاتقان دراماتۋرگتەر از.
«ءقازىر قويلىمداردىڭ سەنارييىن ءوزىم دايىنداپ ءجۇرمىن. ءماتىندى، ونداعى ولەڭدەردى قازاقشالايمىن. بۇرىن سيركتىك قويىلىمداردىڭ بارلىعى ورىس تىلىندە قويىلىپ كەلسە، ءقازىر ەكى تىلدە جۇرەدى. بۇگىنگى ەرتەگى دە ەكى تىلدە بەرىلەدى. ويتكەنى كورەرمەننىڭ ەشقايسىسىن الالاماۋىمىز كەرەك. ونىڭ ۇستىنە قازاقستاندا تۇرىپ، قازاقشا قويىلىم قويا الماساق وندا مەملەكەتتىك ءتىلدىڭ يدەولوگياسىن دۇرىس قولداماعان بولامىز»، - دەدى باقىت بوكەبايەۆ.
ءسوز اراسىندا ول دراماتۋرگيانى سيرك ونەرىمەن بايلانىستىرىپ قويۋ ۇلكەن شەبەرلىك پەن شىعارماشىلىقتى قاجەت ەتەتىنىن جەتكىزدى.
«بۇل ەرتەگىنى دراماتۋرگيادا، وپەرادا قويۋ الدە قالاي وڭاي. ال، سيركتە دراماتۋرگيانى بايلانىستىرىپ، ارتىستەردى اسپانعا ۇشىرىپ، ات جانە باسقا دا اڭداردىڭ سيركتىك تريۋكتەرىمەن قابىستىرىپ بەرە ءبىلۋىڭ كەرەك، ياعني ءار قويىلىمنىڭ اراسىندا ۇندەستىك بولۋ قاجەت. ۇندەستىك بولماسا ونەر كورىنبەيدى، سوندىقتان مۇنىڭ بارلىعى ۇلكەن جۇمىس»، - دەدى سيرك ديرەكتورى.
بۇل جەتى جاستاعى دانات دوسباتىروۆ ءۇشىن دەبيۋتتىك قويىلىم بولىپ وتىر. ول كايدىڭ ءرولىن ويناپ قانا قويماي، باۋمەن كوككە كوتەرىلىپ سيركتىك نومىرلەردى ورىندايدى. ايۋ، جىلقى جانە باسقا دا جانۋارلاردىڭ قاتىسۋىمەن وتەتىن قىزىقتى قويلىم كوپشىلىكتى ءتانتى ەتپەي قويمايدى.
جاڭاجىلدىق باعدارلاما 2022 جىلدىڭ 9 قاڭتارىنا دەيىن جالعاسادى.