بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان.
"التىنەمەل" مەملەكەتتىك ۇلتتىق تابيعي پاركى مەن «ىلە-بالقاش» مەملەكەتتىك تابيعي رەزەرۆاتى اراسىندا ەكولوگيالىق بايلانىستى قالپىنا كەلتىرۋ ماقساتىندا «قاپشاعاي-بالقاش» ەكولوگيالىق ءدالىزى قۇرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قاپشاعاي-بالقاش» ەكولوگيالىق ءدالىزىنىڭ جالپى اۋدانى – 973 765 گەكتار. بۇل ەكودالىز مەملەكەتتىك تابيعي-قورىق قورىنىڭ وبەكتىلەرىن ساقتاۋ، بيولوگيالىق ارتۇرلىلىك، جانۋارلاردىڭ كوشى-قونىنىڭ تابيعي جولدارىن قورعاۋ، جايلاستىرۋ جانە وسىمدىكتەردى ساقتاۋ ءۇشىن وسى ەرەكشە قورعالاتىن تابيعي اۋماقتار اراسىنداعى كەڭىستىكتىك بايلانىستى قامتاماسىز ەتەدى»، - دەلىنگەن ۇكىمەت باسشىسىنىڭ جاۋابىندا.
ونىڭ دەرەگىنشە، قازىرگى ۋاقىتتا «الماتى-تالدىقورعان-وسكەمەن» رەسپۋبليكالىق ماڭىزى بار جول بويىندا «الماتى-سارىوزەك-تالدىقورعان» جانە «الماتى-سارىوزەك-قورعاس» ۋچاسكەلەرىندە جابايى جانۋارلاردىڭ ءقاۋىپسىز كوشى-قونىنا ءتيىستى ەكودۋكتەردى ۇيىمداستىرۋ تالاپ ەتىلەدى. بۇل جولداردىڭ بويىندا مالعا ارنالعان ارنايى وتكەلدەر (17 بىرلىك) بولعانىمەن، جابايى جانۋارلاردىڭ ءوتۋىن تولىق قامتاماسىز ەتپەيدى.
«وسىعان بايلانىستى ۇكىمەتتىڭ تاپسىرماسى بويىنشا ەكولوگيا جانە تابيعي رەسۋرستار مينيسترلىگى مۇددەلى مەملەكەتتىك ورگاندارمەن بىرلەسىپ جابايى جانۋارلاردىڭ كوشى-قون جولدارىن ايقىنداۋ جانە جولدىڭ جوعارىدا كورسەتىلگەن ۋچاسكەلەرىندە ەكودۋكتار سالۋ جونىندەگى جول كارتاسىن ازىرلەپ جاتىر. سونىمەن قاتار، قاراقۇيرىقتاردىڭ ءقاۋىپسىز كوشى-قونى ءۇشىن جول بەتكەيلەرىنە رۇقسات بەرۋ، ۇزدىكسىز ءبولۋ جانە قورشاۋ توسقاۋىلدارىن الىپ تاستاۋ جانە بەلگىلى ءبىر ۋچاسكەلەردە كولىك قوزعالىسىنىڭ جىلدامدىعىن ساعاتىنا 60 شاقىرىمعا دەيىن تومەندەتۋ (جىلدامدىقتى باقىلاۋ كامەرالارىن ورناتۋمەن) نۇسقاسىن قاراستىرۋ جوسپارلاندى. جول كارتاسىن ازىرلەۋ جانە ودان ءارى ىسكە اسىرۋ ۇكىمەتتىڭ باقىلاۋىندا بولادى»، - دەدى ءاليحان سمايىلوۆ.