الماتىدا جالپىۇلتتىق داۋىس بەرۋ پروسەسىن قامتاماسىز ەتۋ ءۇشىن قانداي شارالار قولدانىلعانى تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى اۋماقتىق رەفەرەندۋم كوميسسياسىنىڭ ءتورايىمى جاننا اسانوۆا مەن ورىنباسارى ايگۇل قالىقوۆا ايتىپ بەردى، دەپ حابارلايدى اlmaty-akshamy.kz.
«قالادا بارلىعى 574 ۋچاسكە ۇيىمداستىرىلعان، ونىڭ 67ء-سى ارنايى مەكەمەلەردە – اۋرۋحانالار، ساناتورييلەر، اسكەري بولىمدەر. سايلاۋ كوميسسيالارىنىڭ بارلىق مۇشەلەرى كاسكادتىق مودەل بويىنشا وقىتۋدان ءوتتى. بارلىق سۇراقتار بويىنشا سايلاۋ ۋچاسكەلەرىنە حابارلاسا الاسىزدار»، – دەدى ج. اسانوۆا.
سپيكەرلەر سونداي-اق داۋىس بەرۋ ءتارتىبى مەن ءراسىمىن ءتۇسىندىردى. ماسەلەن، ەلىمىزدىڭ باسقا وڭىرلەرىندە تىركەلگەن، ءبىراق وسى كۇنى الماتى قالاسىندا جۇرگەن ازاماتتار ەسەپتەن شىعارۋ كۋالىكتەرىن پايدالانا وتىرىپ، وزدەرىنىڭ كونستيتۋسيالىق قۇقىعىن پايدالانا الادى.
«داۋىس بەرۋ كۇنى سايلاۋشىلار جەكە كۋالىكپەن كەلەدى، ال اسكەري بولىمدەردە اسكەري بيلەت كورسەتىلەدى. بۇل جاعدايدا ءسىز ءتىپتى ەلەكتروندىق قۇجاتتاردى پايدالانا الاسىز. ءقازىر ادامداردىڭ كوپشىلىگىندە eGov mobile موبيلدىك قوسىمشاسى بار ەكەنى بەلگىلى. داۋىس بەرۋ كۇنى الماتىدا بولعان، ءبىراق باستاپقىدا باسقا وڭىرلەردە تىركەلگەن جەرى بويىنشا تىزىمگە ەنگەن ازاماتتار دا كەز كەلگەن ۋچاسكەدە الىنعان ەسەپتەن شىعارۋ كۋالىكتەرى بويىنشا داۋىس بەرۋگە قۇقىلى. بۇگىندە 646 ەسەپتەن شىعارۋ كۋالىگى بەرىلگەن»، – دەدى ا. قالىقوۆا.
مۇمكىندىگى شەكتەۋلى ازاماتتار ءۇشىن (دەنساۋلىق جاعدايى بويىنشا نەمەسە وتباسىنىڭ ناۋقاس مۇشەسىنىڭ كۇتىمىنە بايلانىستى) ۇيدە داۋىس بەرۋ ۇيىمداستىرىلادى. ول ءۇشىن الدىن الا ءوتىنىش جازۋ كەرەك. مۇنداي وتىنىشتەر 5 ماۋسىمدا 12.00-گە دەيىن قابىلدانادى.
ەسكە سالساق، 5 ماۋسىمدا ساعات 7.00-دەن 20.00-گە دەيىن قازاقستان رەسپۋبليكاسىنىڭ كونستيتۋسياسىنا تۇزەتۋلەر بويىنشا جالپىۇلتتىق رەفەرەندۋم وتەدى.