الماتى - قازاقستانداعى دۇنيەجۇزىلىك قولونەر كەڭەسى (World Crafts Council) World Craft سity – «دۇنيەجۇزىلىك قولونەر قالاسى» قۇرمەتتى مارتەبەسىن العان قالا اتاندى. بۇل شەشىم مەگاپوليستىڭ مادەني مۇرانى ساقتاۋ، قولونەر داستۇرلەرىن دامىتۋ جانە كرەاتيۆتى ەكونوميكانى قولداۋ ىسىندەگى ەلەۋلى ۇلەسىن مويىنداۋدىڭ بەلگىسى بولدى، دەپ حابارلايدى اqshamnews.kz ءتىلشىسى. بۇل تۋرالى الماتى قالاسىنىڭ تۋريزم باسقارماسى حابارلادى.
سەرتيفيكاتتى تابىستاۋ سالتاناتى 5 قازان كۇنى الماتىدا وتكەن ALA CRAFT 2025 حالىقارالىق فەستيۆالى اياسىندا ءوتتى. فەستيۆالگە قازاقستاننان، ازيادان، ەۋروپادان، اۆستراليا مەن اقش-تان كەلگەن 100-دەن استام شەبەر قاتىستى. شارا ورتالىق ازياداعى قولونەر سالاسىنداعى ەڭ ءىرى مادەني الاڭعا اينالدى.
«الماتىنىڭ World Craft City مارتەبەسىن الۋى – قالامىز ءۇشىن ماڭىزدى جەتىستىك. بۇل اتاق الماتىنىڭ كرەاتيۆتى يندۋستريالار مەن مادەني ءتۋريزمنىڭ ورتالىعى رەتىندەگى حالىقارالىق بەدەلىن ارتتىرادى. سونداي-اق ول قولونەر داستۇرلەرىن الەمدىك دەڭگەيدە ناسيحاتتاۋعا، ءبىلىم بەرۋ باعدارلامالارىن جانە شەبەرلەرگە ارنالعان حالىقارالىق رەزيدەنسيالار جۇيەسىن دامىتۋعا، سونداي-اق قالانىڭ ەكونوميكاسىنا ىقپالداسقان تۇراقتى قولونەر ەكوجۇيەسىن قالىپتاستىرۋعا مۇمكىندىك بەرەدى»، – دەدى الماتى قالالىق تۋريزم باسقارماسىنىڭ باسشىسى عاليا توقسەيىتوۆا.
دۇنيەجۇزىلىك قولونەرشىلەر كەڭەسىنىڭ ازيا-تىنىق مۇحيتى ايماعى بويىنشا پرەزيدەنتى دجۋد ۆان دەر مەرۆەنىڭ ايتۋىنشا، الماتىنىڭ بۇل مارتەبەنى يەلەنۋى حالىقارالىق مادەني ىنتىماقتاستىق پەن شىعارماشىلىق يندۋستريالاردىڭ دامۋىنا جاڭا مۇمكىندىكتەر اشادى.
فەستيۆالدىڭ ەرەكشە ءساتى – الەمدىك رەكوردتىڭ ورناتىلۋى بولدى: قازاقستاندىق كۇش اتاسى، ءتورت دۇركىن الەم رەكوردشىسى جانە گيننەستىڭ رەكوردتار كىتابىنىڭ يەگەرى سەرگەي سىرۋلنيكوۆ نەبارى ءبىر مينۋتتا توعىز ات تاعاسىن مايىستىرىپ، الدىڭعى الەمدىك كورسەتكىشتەن ءۇش ەسەدەن استام اسىپ ءتۇستى. بۇل جەتىستىك رەسمي تۇردە Global Book of Records كىتابىندا تىركەلدى.
الماتى ورتالىق ازياداعى تۋريستىك جانە مادەني ورتالىق رەتىندەگى بەدەلىن نىعايتا تۇسۋدە: تەك 2025 جىلدىڭ العاشقى جارتى جىلدىعىندا قالاعا 1،14 ميلليون تۋريست كەلىپ، ونىڭ 323 مىڭى – شەتەلدىك قوناقتار بولدى.
World Craft City مارتەبەسىنىڭ بەرىلۋى مەن ALA CRAFT 2025 فەستيۆالىنىڭ وتكىزىلۋى مەگاپوليستىڭ كرەاتيۆتى ەكونوميكا مەن مادەني ءتۋريزمدى دامىتۋداعى كوشباسشىلىعىن دالەلدەيدى.