قاسيەتتى رامازان ايى باستالدى – بۇل ورازا، قۇلشىلىق جانە رۋحاني تازارۋ ۋاقىتى.
1 ناۋرىز بەن 29 ناۋرىز ارالىعىندا الەم مۇسىلماندارى ورازا ۇستاپ، ال 30 ناۋرىز كۇنى ورازا ايت مەيرامىن اتاپ وتەدى، دەپ حابارلادى الماتى قالاسىنىڭ باس يمامى تولەبي قاجى وسپان وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا.
«رامازان – سابىر، يگى ىستەر جانە رۋحاني كەمەلدەنۋ ايى. ورازا – تەك تاماق پەن سۋدان تىيىلۋ عانا ەمەس، جان دۇنيەنى تازارتىپ، ءناپسىنى تاربيەلەۋ»، – دەپ ەسكە سالدى يمام.
ونىڭ ايتۋىنشا، قالاداعى بارلىق مەشىتتەردە تاراۋيح نامازدارى وقىلىپ، قۇران حاتىم تۇسىرىلەدى.
جاماعاتتىڭ ىڭعايلىلىعى ءۇشىن الماتى ورتالىق مەشىتىندە «رامازان شاتىرىن» ورناتۋ جوسپارلانىپ وتىر. وندا كۇن سايىن 450 ادامعا تەگىن اۋىزاشار بەرىلەدى.
سونىمەن قاتار، ءتۇرلى دارىستەر مەن رۋحاني كەزدەسۋلەر ۇيىمداستىرىلادى.
يمام كاسىپكەرلەرگە ۇندەۋ جاساپ، رامازان قۇرمەتىنە الەۋمەتتىك ماڭىزى بار تاۋارلار مەن ازىق-تۇلىك باعاسىن 10%-عا تومەندەتۋگە شاقىردى. سونىمەن قاتار، تۇرعىندارعا قاسيەتتى ايدا الكوگول ونىمدەرىن ساتۋدان جانە ىشۋدەن باس تارتۋ ۇسىنىلدى.
اي بويى قالا مەشىتتەرىندە ءدىني دارىستەر، ءتۇسىندىرۋ جۇمىستارى جانە مەرەكەلىك شارالار وتەدى. ولاردىڭ ىشىندە رۋحاني داستۇرلەردى جانداندىرۋعا باعىتتالعان «جاراپازان-Party» بايقاۋى دا بار.