1935 جىلى قوعام قايراتكەرى تەمىربەك جۇرگەنوۆتىڭ باستاماسىمەن نەگىزى قالانعان رەسپۋبليكانىڭ تۇڭعىش قۋىرشاق تەاترى بيىل 90 جىلدىق مەرەيلى بەلەسىن اتاپ وتۋدە. قازاق ساحنا ونەرىنىڭ ەرەكشە سالاسى سانالاتىن بۇل ونەر ورداسى تالاي بۋىننىڭ بالالىق شاعىنا شاتتىق سىيلاپ، ۇلتتىق مادەنيەتتىڭ دامۋىنا ولشەۋسىز ۇلەس قوستى. توقسان جىلدىق تاريحىندا تەاتر كوركەمدىك ىزدەنىستەر مەن شىعارماشىلىق جەتىستىكتەرگە تولى جولدى ەڭسەردى.
ونەر ورداسى اعىمداعى جىلدىڭ 10 قىركۇيەك كۇنى، ساعات 14.00-دە مەرەيلى 90-شى ماۋسىمىنىڭ شىمىلدىعىن تۇرمەك. تەاتردىڭ جاڭا ماۋسىماشارى اياسىندا كورەرمەن نازارىنا قازاق ۇلتتىق قۋىرشاق ونەرىنىڭ رۋحى مەن ماڭىزىن دارىپتەيتىن «ورتەكە» سپەكتاكلىنىڭ پرەمەراسىۇسىنىلادى. قويىلىم رەجيسسەرى – گريگوريي لايكو. سونىمەن قاتار، قۋىرشاق تەاترىنىڭ 90 جىلدىق تاريحىن توعىستىرعان تاريحي-تانىمدىق كىتاپتىڭ تۇساۋكەسەرى جانە جادىگەر قۋىرشاقتار مەن تەاتر جەتىستىكتەرىنە ارنالعان تەاتر قابىرعاسىنان تۇڭعىش رەت تەاتر مۋزەيىنىڭ اشىلۋى وتەدى.
90 جىلدىق تاريحقا يە قۋىرشاق تەاترى ءۇشىن حالقىمىزدىڭ كونە زامانداردان بۇگىنگى كۇنگە جەتكەن كيەلى ونەرىن، ءسالت-داستۇرىن، ۇلتتىق كيىمدەرى مەن مۋزىكالىق اسپاپتارىن جانە حالىق اۋىز ادەبيەتىنىڭ ايگىلى كەيىپكەرلەرىن جاڭاشىل باعىتتا تانىستىرۋدى كوزدەيتىن «ورتەكە» سپەكتاكلى – كورەرمەندەردى بەيجاي قالدىرماسى انىق. بۇلدىرشىندەرمەن ينتەراكتيۆتى بايلانىس، تەبىرەنتەرلىك اندەر مەن كۇيلەر، زور ىقىلاسپەن جاسالعان ايرىقشا قۋىرشاقتار جاڭا تۋىندىنىڭايرىقشا تۇسى بولماق. سيۋجەت جەلىسى بويىنشا حالقىمىزدىڭ ونەرپاز تۇلعالارى جينالعان قاۋىمعا ورتەكە ونەرىنىڭ ەرەكشەلىگى تۋراسىندا سىر شەرتىپ، كورەرمەندەرمەن بىرگە اڭىزدار مەن ەرتەگىلەر الەمىنە ساپار شەگەدى.
ماۋسىم اشىلۋى مەرەكەسىنىڭ ماڭىزدى ءىس-شاراسىنىڭ ءبىرى – قۋىرشاق تەاترىنىڭ 90 جىلدىق مەرەيتويى اياسىندا ارحيۆتىك ماتەريالداردان باستاپ، بۇگىنگى شىعارماشىلىق تىنىسىنا دەيىنگى ارالىق قامتىلعان تاريحي-تانىمدىق «تامىرى تەرەڭ تەاتر: 90 جىلدىڭ ىزىمەن» كىتابىنىڭ تۇساۋكەسەرى بولماق. عاسىرعا جۋىق ۋاقىت كولەمىندەگى تاريحتى قامتيتىن اتالمىش ەڭبەك تەاتر سالاسىنىڭ زەرتتەۋشىلەرىنە، بولاشاق ماماندارىنا، كەلەر ۇرپاققا ماڭىزدى مۇرا بولماق. كىتاپتىڭ قۇراستىرۋشى اۆتورى ءارى رەداكتورى – گۇلىم كوپباي قىزى.
«ارحيۆتىك ماتەريالدار ارقىلى تەاتردىڭ وسۋ-وركەندەۋ جولى زەرتتەلىپ، كەزەڭدىك قويىلىمدار مەن اكتەرلىك، رەجيسسەرلىك جەتىستىكتەرى حاقىندا وي ءوربىتىلدى»، – دەپ اتاپ ءوتتى اۆتور.
سونىمەن قاتار، تارحى تەرەڭ ونەر مەكەنىنىڭ جادىگەر قۋىرشاقتارى، ايگىلى ونەر جۇلدىزدارى بەينەسىندەگى قۋىرشاقتار، سپەكتاكل ەسكيزدەرى مەن تاريحي فوتوسۋرەتتەر قامتىلعان مۋزەيدىڭ رەسمي اشىلۋى وتكىزىلەدى.
مەرەيلى 90-شى ماۋسىمنىڭ اشىلۋى – قۋىرشاق تەاترى ءۇشىن ۇلكەن مەرەكە ءارى ۇلت رۋحانياتىنىڭ وتكەنىن ۇلىقتاپ، بولاشاعىنا باعىت سىلتەيتىن تاعىلىمدى وقيعا بولماق. قۋىرشاق ونەرى ارقىلى حالقىمىزدىڭ تاريحى مەن ءسالت-داستۇرى، ۇلتتىق بولمىسى جاڭا قىرىنان جارقىراي ءتۇسىپ، كورەرمەن جۇرەگىنە جول تابارى ءسوزسىز.
ونەر سۇيەر قاۋىم مەن بۇلدىرشىندەردى قۋىرشاق تەاترى اسىعا كۇتەدى!
ماۋسىماشار باعدارلاماسى:
14.00 – باسپا ءسوز كونفەرەنسياسى، «تامىرى تەرەڭ تەاتر: 90 جىلدىڭ ىزىمەن» كىتابىنىڭ تۇساۋكەسەرى
14.30 – تاريحي جادىگەر قۋىرشاقتار مەن تەاتر جەتىستىكتەرىنە ارنالعان تۇڭعىش مۋزەيدىڭ اشىلۋى
15.00 – «ورتەكە» (رەجيسسەرى: گ. لايكو)سپەكتاكلىنىڭ پرەمەراسى