جازعى دەمالىس پەن سۋعا شومىلۋ ماۋسىمى باستالىسىمەن سۋ ايدىندارىنداعى دەمالىس ۋاقىتىندا ءقاۋىپ ارتا تۇسەدى.
اسىرەسە بالالارعا تونەتىن ءقاۋىپ كوپ، سوعان بايلانىستى قۇتقارۋ قىزمەتتەرى كۇندەلىكتى رەيد جۇرگىزەدى. الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا قالا تجد وكىلدەرى مەن قالالىق قۇتقارۋ قىزمەتتەرىنىڭ قىزمەتكەرلەرى تۇرعىندارعا سۋدىڭ جانىندا ءقاۋىپسىز ۋاقىت وتكىزۋ ەرەجەلەرىن ەسكە سالدى، دەپ حابارلايدى Almaty-akshamy.kz.
تجد مالىمەتى بويىنشا، مەگاپوليستە 44 سۋ ايدىنى بار – ولار ءتۇرلى وزەندەر مەن كولدەر، ارىقتار مەن توعاندار. ولاردىڭ 12ء-سى سۋعا شومىلۋ ماۋسىمىندا ءقاۋىپتى.
«پروفيلاكتيكالىق جۇمىستىڭ ناتيجەسىندە 2022 جىلدان باستاپ بۇگىنگى كۇنگە دەيىن سۋ ايدىندارىندا ادام ولىمىنە جول بەرىلمەدى. 18 ادام قۇتقارىلدى، ولاردىڭ ىشىندە جەتى بالا بار»، - دەدى الماتى قالاسى تجد ازاماتتىق قورعانىس باسقارماسىنىڭ باستىعى ءانۋار يۋسۋپوۆ.
دەپارتامەنت سۋداعى جازاتايىم وقيعالاردى بولدىرماۋ ماقساتىندا پوليسيا قىزمەتكەرلەرىن، اسكەري قىزمەتشىلەردى، قۇتقارۋ قىزمەتى مەن رەسپۋبليكالىق جەدەل قۇتقارۋ جاساعى قۇتقارۋشىلارىن، سونداي-اق ەرىكتىلەردى تارتا وتىرىپ، رەيدتىك ءىس-شارالار وتكىزەدى.
قاۋىپسىزدىك ەرەجەلەرى تۋرالى «اۋەجاي» سۋ-قۇتقارۋ ستانسياسىندا كىشى الماتى كولىندە كەزەكشىلىك ەتەتىن ق ر تجم رەسپۋبليكالىق جەدەل-قۇتقارۋ جاساعىنىڭ باس قۇتقارۋشىسى رينات فايزۋلين ەسكە سالدى.
«مەن جاز كەزىندە اتا-انالار، وقىتۋشىلار مەن تاربيەشىلەر ءبىلۋى كەرەك نەگىزگى ەرەجەلەرگە نازار اۋدارعىم كەلەدى. بالالاردىڭ سۋعا باتۋىنىڭ ەڭ نەگىزگى سەبەپتەرى - بالالاردى سۋ ايدىندارىنىڭ جانىندا قاراۋسىز قالدىرۋ. بالالاردىڭ جابدىقتالماعان جەرلەردە، تاۋ وزەندەرىندە سۋعا ءتۇسۋى – بۇل ۇلكەن ءقاۋىپ. سەبەبى، بالالار سەلفيگە ءتۇسۋ ءۇشىن تايعاق تاستارعا شىعادى، سودان اياقتارى تايىپ قۇلاپ، اتا-اناسى جاقىن جەردە بولسا دا، باسىمەن سۋعا قۇلاۋى مۇمكىن»، - دەدى سپيكەر.
سونىمەن قاتار، ول ەشقانداي جاعدايدا سۋ ايدىندارىنىڭ جانىندا جابدىقتالعان بەلگىلەردى ەلەمەۋگە بولمايتىنىن اتاپ ءوتتى. وسىلايشا، تىيىم سالۋ بەلگىلەرى ورناتىلعان شومىلۋ ورىندارىندا موتورلى قايىقتاردا، گيدروسيكلدەردە جۇزۋگە، سونداي-اق تىك جارتاستاردان، قايىقتاردان، كاتامارانداردان جانە ت. ب. سەكىرۋگە بولمايدى.
«سونداي-اق، بالالار سۋعا شومىلىپ جۇرگەندە ويناپ ءجۇرىپ، ارىرەك ءجۇزىپ كەتكەندەرىن بايقاماي، تەرەڭدەۋ جاعىنا كەتىپ قالىپ، سۋعا تۇنشىعىپ قالۋى مۇمكىن. سونداي-اق، ۇيدە قولدان جاسالعان ۇرلەمەلى قۇرالداردا، اۆتوكولىك دوڭگەلەگىنىڭ كامەرالارىندا جۇزۋگە تىيىم سالىنادى. ءبىزدىڭ جاساق پروفيلاكتيكالىق ءىس-شارالار، تاۋ وزەندەرى بويىنشا رەيدتەر وتكىزەدى، وندا ءبىز سۋ ماڭىندا قالاي ءجۇرۋ كەرەكتىگى جونىندە ەرەجەلەرى كورسەتىلگەن ارنايى جادىنامالاردى اتا-انالارعا تاراتامىز. سونداي - اق بىزدە اۋەجاي ماڭىنداعى كولدە تاۋلىك بويى كەزەكشىلىك جۇزەگە اسىرىلادى، وندا دا ەسكەرتۋ جانە تىيىم سالۋ بەلگىلەرى دە ورناتىلعان»، - دەپ ءبولىستى ول.
قورىتىندىلاي كەلە، قۇتقارۋشىلار اتا-انالاردى بالالاردى ەرەسەكتەردىڭ قاراۋىنسىز جالعىز قالدىرماۋعا، سونداي-اق الدىن الۋ شارالارى رەتىندە ولارعا سۋعا ءتۇسۋ ەرەجەلەرى تۋرالى ايتۋعا شاقىردى.