ناۋرىزباي اۋدانىنىڭ تۇرعىندارىمەن كەزدەسۋدە الماتى اكىمى ەربولات دوسايەۆ اۋداندىق ماڭىزى بار جولداردىڭ قۇرىلىسى مەن جوندەلۋى تۋرالى ايتتى، دەپ حابارلايدى Almaty-akshamy.kz.
"ناۋرىزباي اۋدانىنىڭ بارلىق شاعىن اۋداندارىندا جولداردى اعىمداعى جوندەۋ جۇمىستارى بەلسەندى جۇرگىزىلۋدە. بۇگىنگى تاڭدا 70 كوشەدە 30 مىڭ م2 جول جوندەلدى. جىل سوڭىنا دەيىن 130 كوشەنى قامتيتىن تاعى 25 مىڭ م2 جولدى جوندەۋ جوسپارلانۋدا"، - دەدى اكىم.
سونىمەن قاتار، قالالىق موبيلدىلىك باسقارماسى شىلدە ايىندا اقجار جانە شۇعىلا ش / ا 10 كوشە بويىنشا 6،5 شاقىرىم جول سالۋدى باستادى. 10 كوشەدە 6،9 كم جولعا ورتاشا جوندەۋ جۇرگىزىلدى. اعىمداعى جىلدىڭ قاراشا ايىنىڭ سوڭىنا دەيىن ۇزىندىعى 7 كم بولاتىن تاعى 6 كوشەدە ورتاشا جوندەۋ جۇمىستارى جۇرگىزىلەدى.
ەسكە سالساق، بيىل الماتىدا ۇزىندىعى 200 كم بولاتىن 230 كوشەنى ورتاشا جوندەۋمەن قامتۋ جوسپارلانۋدا، ونىڭ ىشىندە 73 كم ناۋرىزباي جانە الاتاۋ اۋداندارىندا ورنالاسقان. 215 كوشە اۋداندىق ماڭىزى بار كوشەلەر بولىپ تابىلادى. العاباس، تەرەكتى، توميريس، قاراسۋ، اقبۇلاق، زەردەلى، شاپاعات، شۇعىلا، تاۋسامالى، قالقامان، راحات، جاس قانات شاعىن اۋداندارىنا ەرەكشە كوڭىل ءبولىندى.