الماتى قالاسىنداعى ەمحانالاردا ۋچاسكەلىك دارىگەرلەرگە عانا ەمەس، كەڭەيتىلگەن پراكتيكا مەدبيكەلەرىنە دە قابىلداۋعا جازىلۋعا بولادى.
بۇل كەزەكتى ەداۋىر قىسقارتۋعا سەپتىگىن تيگىزىپ وتىر. ال قالالىق شۇعىل مەديسينالىق كومەك اۋرۋحاناسى ماماندارى ميداعى پاتولوگيالىق وزگەرىستەردى جاساندى ينتەللەكتىنىڭ كومەگىمەن جەدەل انىقتاۋعا ماشىقتانعان. الماتى قالاسىنىڭ مەديسينالىق ۇيىمدارى الەۋمەتتىك مەديسينالىق ساقتاندىرۋ قورى باسشىسىنا ءوز جۇمىستارىن كورسەتىپ، وزەكتى ماسەلەر تۋرالى باياندادى جانە وزىق تاجىريبەلەرىمەن ءبولىستى، دەپ حابارلايدى Almaty-akshamy.kz.
الەۋمەتتىك مەديسينالىق ساقتاندىرۋ قورىنىڭ باسقارما ءتوراعاسى ءسابيت احمەتوۆ دەنساۋلىق ساقتاۋ سالاسىنا قانداي جۇيەلى شەشىمدەر قاجەتتىگىن دارىگەرلەردىڭ ءوز اۋزىنان ەستىپ، كلينيكالاردىڭ جۇمىسىمەن تانىسۋ ماقساتىندا الماتىداعى مەديسينا ۇيىمدارىن ارالادى.
كەيدە مەديسينالىق كومەكتىڭ ءبىر ءتۇرى مەن قارجىلاندىرۋ مەحانيزمى تۋرالى الۋان ءتۇرلى جاعدايلار قالىپتاسادى. اتاپ ايتقاندا، تىركەلگەن حالىق سانى الدەقايدا از كلينيكالار ءوز قىزمەتىن دامىتىپ وتىرسا، ءىرى ەمحانالار قاراجاتتىڭ جەتىسپەۋشىلىگىنە، كادر تاپشىلىعى مەن جابدىقتىڭ جوقتىعىنا، كلينيكانىڭ وندىرىستىك قۋاتىنىڭ تولىق پايدالانىلماي وتىرعانىن العا تارتادى. دەسە دە، مەملەكەتتىك مەديسينا ۇيىمدارى جەرگىلىكتى بيلىك تاراپىنان قىمبات قۇرال-جابدىقتارمەن جابدىقتالادى، كۇردەلى جوندەۋ، مامانداردى وقىتۋ، باسپانامەن قامتۋ سىندى جۇمىستار دا مەملەكەت قارجىسىنا جۇرگىزىلەدى.
قور باسشىسى الدىمەن وسى جىلدىڭ 7 ايىندا 10 مىڭنان استام پاسيەنتتى ەمدەپ، ونىڭ 7 مىڭعا جۋىعىنا وتا جاساعان №4 قالالىق كلينيكالىق اۋرۋحاناعا باردى. وندا تۇركسىب جانە جەتىسۋ اۋداندارىنىڭ تۇرعىندارىنا، كەيبىر پروفيلدەر بويىنشا (كومبۋستيولوگيا، تراۆماتولوگيا) قالا تۇرعىندارىنا شۇعىل كومەك كورسەتىلەدى. سونىمەن بىرگە ەلىمىزدىڭ بارلىق وڭىرىنەن كەلگەن پاسيەنتتەر جوسپارلى تۇردە ەمدەلەدى.
بۇل – قالاداعى كۇيىك بولىمشەسى بار جالعىز اۋرۋحانا. سونداي-اق، اۋىر جاراقات العان ناۋقاستار دا وسىندا ەمدەلەدى جانە مەديسينالىق وڭالتۋدان وتەدى. دەگەنمەن، باس دارىگەر ءبىرجان دوسمايىلوۆتىڭ ايتۋىنشا، كۇيىك شالعان جانە اۋىر جاراقاتپەن تۇسكەن پاسيەنتتەردىڭ ەمىنە تولەنەتىن اقى شىعىندى تولىق جاپپايدى. سەبەبى پاسيەنتتەر جانساقتاۋ بولىمىندە ۇزاق جاتاتىندىقتان، ەم-دوم الدەقايدا قىمباتقا تۇسەدى.
مۇندا جوعارى تەحنولوگيالىق وپەراسيالار مەن جوسپارلى ەمدەۋگە جاتقىزۋ سانى ارتسا، شۇعىل مەديسينالىق كومەككە جۇگىنەتىندەر، ءولىم-جىتىم كورسەتكىشى ازايىپ كەلەدى. №5 قالالىق ەمحانا ۇزدىك تاجىريبەلەر ورتالىعى جانە مەديسينالىق ۋنيۆەرسيتەتتەردىڭ وقۋ بازاسى بولىپ سانالادى. مۇندا قالا تۇرعىندارى ءۇشىن گەپاتوورتالىق، ەندوسكوپيالىق بولىمشە جۇمىس ىستەيدى. دەسە دە، قور باسشىسى دالىزدەردە ىعى-جىعى حالىقتىڭ جوقتىعىنا تاڭ قالدى. باس دارىگەر گۇلشاحيرا قامباروۆانىڭ ايتۋىنشا، ەمحانادا بايلانىس ورتالىعىنىڭ جۇمىسى دۇرىس جولعا قويىلعان. باسىم بولىگىن ەگدە جاستاعى بايىرعى تۇرعىندار قۇرايتىن كونتينگەنت الدىن-الا تەلەفون ارقىلى جازىلۋعا داعدىلانعان. ەڭ قىزىعى، مۇندا پاسيەنتتەردى كەڭەيتىلگەن پراكتيكالىق مەدبيكەلەر دە قابىلدايدى، ولارعا دا جەكە جازىلۋعا بولادى. مەدبيكەلەر ارنايى وقىتىلىپ، ديسپانسەرلىك ەسەپتە تۇرعان جانە اۋرۋلاردى باسقارۋ باعدارلامالارىنا قاتىساتىن پاسيەنتتەرگە قىزمەت كورسەتەدى. بۇل ءوز كەزەگىندە دارىگەردىڭ جۇكتەمەسىن ازايتىپ، كەزەك سانىن قىسقارتۋعا مۇمكىندىك بەرەدى.
Keruen Medicus كلينيكاسى تۇرعىندارعا باستاپقى مەديسينالىق سانيتارلىق كومەكپەن قاتار، ستاسيونارلىق قىزمەتتەردى دە كورسەتەدى. ستاسيوناردىڭ توسەك-ورىن قورى حيرۋرگيالىق، ۋرولوگيالىق، گينەكولوگيالىق، قالپىنا كەلتىرۋ ەمى جانە كارديولوگيا، نيەۆرولوگيا، تراۆماتولوگيا باعىتى بويىنشا مەديسينالىق وڭالتۋ جۇرگىزۋگە مۇمكىندىك بەرەدى. باس دارىگەر مارجان چانكانوۆانىڭ ايتۋىنشا، مۇندا بۇيرەگىن اۋىستىرعان پاسيەنتتەر ديناميكالىق باقىلاۋعا الىنادى. ولار ديسپانسەرلىك ەسەپكە تۇرىپ، وزدەرىن وسى كلينيكاعا تىركەۋدى سۇرايدى، دەيدى ول. ءسابيت احمەتوۆ بۇل پاسيەنتتىڭ ەركىن تاڭداۋ قۇقىعىنىڭ ساقتالۋ كورسەتكىشى ەكەنىن اتاپ ءوتتى.
ىزىنشە قور باسشىسى قالالىق شۇعىل مەديسينالىق جاردەم اۋرۋحاناسىنىڭ جۇمىسىمەن تانىستى. مەكەمەنىڭ قارجىلىق جاعدايى كۇردەلى. ويتكەنى ۇكىمەت قاۋلىسىنا سايكەس، جىل سايىن قىزمەتكەرلەردىڭ جالاقىسىن (دارىگەرلەرگە – 30%، مەدبيكەلەرگە – 20%، كىشى مەديسينالىق قىزمەتكەرلەرگە – 18%) كوتەرۋ قاجەت، بۇل بيۋدجەتكە ۇلكەن جۇكتەمە تۇسىرەدى. وسىعان ساي اتالمىش اۋرۋحانا دارىگەرلەر سانىن ءبىرشاما قىسقارتقان. سوعان قاراماستان، قاراجاتتىڭ 70%-دان استامى جالاقىعا جۇمسالادى.
پاسيەنتتەردىڭ كوبى مۇندا شۇعىل تۇردە تۇسەدى جانە مەديسينالىق كومەكتىڭ تولىق كەشەنىن قاجەت ەتەدى. اسىرەسە، ينسۋلت سوققان پاسيەنتتەر رەانيماسيادا ۇزاق جاتادى، ەمدەۋ بارىسىندا قوسىمشا اۋرۋلارىن ەمدەۋ قاجەت بولادى جانە قىمبات دارىلەر بەرىلەدى. ءبىراق ءتاريفتىڭ تومەندىگىنەن تولەنەتىن قاراجات ەمدەۋگە جۇمسالعان شىعىندى تولىق وتەۋگە جەتپەيدى. سوندىقتان اۋرۋحانا باسشىلىعى ءتاريفتى كوتەرۋ ماسەلەسىن العا تارتتى.
قارجىلىق قيىندىقتارعا قاراماستان، اۋرۋحانا دارىگەرلەرى جاڭا اقپاراتتىق تەحنولوگيالاردى زەرتتەپ، جۇمىستا جاساندى ينتەللەكت باعدارلامالارىن قولدانىپ ءجۇر. مىسالى، ولار نەيروحيرۋرگيا سالاسىندا سerebra جاساندى ينتەللەكت ەلەمەنتتەرى بار اقپاراتتىق جۇيەنى پايدالانادى. ول ميدىڭ كومپيۋتەرلىك توموگرافيا سۋرەتتەرىن جۇكتەۋگە جانە پاتولوگيالىق وزگەرىستەردى بىردەن انىقتاۋعا مۇمكىندىك بەرەدى.
سونىمەن قاتار باس دارىگەر الماز دجۋۆاشيەۆ باسشىلىق ەتەتىن جەدەل مەديسينالىق جاردەم اۋرۋحاناسى Up to Date اقپاراتتىق جۇيەسىنە كىرۋ گرانتىن جەڭىپ الدى. بۇل – دالەلدى مەديسينا قاعيداتتارى بويىنشا قالىپتاساتىن عالامدىق اقپارات بازاسى. ونى پراكتيكالىق دارىگەرلەر كلينيكالىق شەشىمدەر قابىلداۋ ءۇشىن جانە اۋىر جاعدايلاردا قولدانادى. بازا دۇنيەجۇزىلىك دەنساۋلىق ساقتاۋ ۇيىمىنىڭ، پراكتيك مامانداردىڭ بەيىندىك قاۋىمداستىقتارىنىڭ ۇسىنىمدارىن ەسكەرە وتىرىپ، ۇنەمى جاڭارتىلىپ وتىرادى. بۇل ماتەريالدار دارىگەرلەرگە دياگنوز قويۋ، قاتار جۇرەتىن پاتولوگيا بولعان كەزدە ەمدەۋ تاكتيكاسىن تاڭداۋعا كومەكتەسەدى.
ايتا كەتەرلىگى، ءقازىر الماتى قالاسىنىڭ مەديسينالىق ۇيىمدارىندا شىعىنداردى ەسەپتەۋ بويىنشا پيلوتتىق جوبا جۇرگىزىلىپ جاتىر. مىسالى، بۇرىن دارى-دارمەكتىڭ تاراتىلۋىن تەك بولىمشە دەڭگەيىندە ەسەپتەۋ مۇمكىن ەدى. ءقازىر مەديسينا قىزمەتكەرلەرى بەرىلگەن دارى-دارمەكتەر تۋرالى مالىمەتتەردى جۇيەگە ەنگىزە الادى. بۇل قاراجاتتىڭ دۇرىس جۇمسالۋىن، تولەم ءۇشىن قولدالىناتىن تاريفتەردىڭ دالدىگىن، سونداي-اق مەديسينالىق ۇيىمنىڭ ءاربىر پاسيەنتتى ەمدەۋگە قانشا قاراجات جۇمسايتىنىن قاداعالاۋعا مۇمكىندىك بەرەدى.
ايتا كەتۋ كەرەك، الماتى قالاسىنىڭ مەديسينالىق ۇيىمدارىن تمككك جانە ءمامس ەسەبىنەن قارجىلاندىرۋعا 300 ملرد تەڭگەدەن استام قاراجات قاراستىرىلعان.