مەملەكەت باسشىسىنىڭ 2022 جىلدىڭ قاراشا ايىندا جانە اعىمداعى جىلدىڭ تامىز ايىندا بەرىلگەن تاپسىرمالارىن ورىنداۋ شەڭبەرىندە جاقسى ناتيجەلەرگە قول جەتكىزىلدى.
بۇل تۋرالى الماتى قالاسى ءماسليحاتىنىڭ كەزەكتەن تىس XIII سەسسياسىندا الماتى اكىمىنىڭ ورىنباسارى اسقار ءامرين باياندادى، دەپ حابارلايدى Almaty-akshamy.kz.
پرەزيدەنت الماتى قالاسى تۇرعىندارىنىڭ ءومىر ءسۇرۋ دەڭگەيىن كوتەرۋدى تاپسىردى. بۇعان ەكونوميكا مەن الەۋمەتتىك سالانى دامىتۋ، ساپالى سۋمەن جابدىقتاۋ جانە ىڭعايلى قوعامدىق كولىكتى قامتاماسىز ەتۋ، اۋا ساپاسىن جاقسارتۋ جانە تاعى باسقا شارالار باعىتتالعان.
ءبىز الماتىنىڭ 2040 جىلعا دەيىنگى جاڭا باس جوسپارىن، الماتى اگلومەراسياسىن دامىتۋدىڭ كەشەندى جوسپارىن جەدەل قاراپ قابىلدادىق. سونىمەن قاتار كوممۋنالدىق قىزمەتتەرگە تاريفتەردىڭ ءوسۋىن وتەۋ ءۇشىن حالىقتىڭ الەۋمەتتىك وسال توپتارىنا جاتاتىن ازاماتتارعا ارنالعان تولەمدەردى بەكىتتىك، جانە الداعى ءۇش جىلدىق كەزەڭدەگى قالانىڭ الەۋمەتتىك باعىتتالعان بيۋدجەتىن قابىلدادىق.
بۇگىن ءسىزدىڭ قاراۋىڭىزعا ەنگىزىلگەن الماتى قالاسىنىڭ ديزاين-كودى اتالعان ماڭىزدى قۇجاتتار قاتارىنا قوسىلۋدا. ول ءماسليحاتتىڭ قۇرىلىس، ساۋلەت، ۋربانيستيكا جانە جەر قاتىناستارى جونىندەگى كوميسسيا مۇشەلەرىمەن قارالىپ پىسىقتالدى.
الماتىنىڭ ديزاين-كودى – قالالىق ورتانى قالىپتاستىرۋ بويىنشا ەرەجەلەر مەن قاعيدالاردىڭ جيىنتىعى. ول قالا تۇرعىندارى ءۇشىن قولايلى ۇيلەسىمدى مەگاپوليس قۇرۋعا باعىتتالعان.
ديزاين-كود شەڭبەرىندە ءبىز ەكى ماقساتقا قول جەتكىزەمىز. ءبىرىنشى ماقسات – الماتىنىڭ تانىمال تاريحي كەلبەتىن ساقتاۋ، ەكىنشى –الەمدىك ۇردىستەردى ەسكەرە وتىرىپ، قالامىزدىڭ بولاشاق مەگاپوليس رەتىندەگى بەينەسىن دامىتۋ.
ديزاين-كودتى ازىرلەۋ اياسىندا حالىقارالىق تاجىريبەنىڭ تالداۋى جۇرگىزىلىپ، ساراپشىلارمەن 15 جوبالىق سەمينار ۇيىمداستىرىلدى. قالا تۇرعىندارىنىڭ 13 مىڭنان استام ساۋالناماسى جينالىپ قاراستىرىلدى. رەسپوندەنتتەردىڭ 50%–ى قالامىزدا تۋعاننان بەرى تۇرىپ كەلە جاتقان الماتىلىقتار.
ديزاين-كود ءىس جۇزىندە ۇنەمى قولدانىلاتىن جۇمىس قۇجاتى رەتىندە جاسالعان. سوندىقتان قۇجات قاراپايىم تىلدە جازىلعان جانە ناقتى ادرەساتتارعا ارنالعان. بۇل ءبىزدىڭ قالامىزدىڭ تۇرعىندارى، كاسىپكەرلەر، مەملەكەتتىك ورگاندار جانە كرەاتيۆتى قوعامداستىق وكىلدەرى مەن باسقالار. بارلىعى 8 سانات.
تالقىلاۋ جانە ناقتىلاۋ ناتيجەسىندە ديزاين-كود قالالىق قوعامداستىقتاردىڭ قاجەتتىلىكتەرى مەن ۇمىتتەرىن تولىق قاناعاتتاندىرۋ ماقساتىندا بەيىمدەلدى. ءماسليحاتتىڭ سالالىق كوميسسياسىنىڭ وتىرىسىندا بەرىلگەن ەسكەرتۋلەر ءوز ۇلەسىن قوستى.
نۇرسۇلتان نۇرلان ۇلى سىزگە جەكە العىس بىلدىرگىم كەلەدى. ءسىز ديزاين-كودتى سيپاتتاعاندا، ونىڭ بولاشاق وزگەرىستەرگە اشىق قۇجات ەكەنىن وتە ورىندى ايتىپ ءوتتىڭىز. بۇل قۇجات قالادا وزگەرىستەر باستالعان كەزدە ايقىندالاتىن بولادى.
ءبىز ديزاين-كودتى بىركەلكى جانە كەزەڭدى تۇردە ەنگىزۋدى جوسپارلاپ وتىرمىز. قالا اكىمىنىڭ تاپسىرماسى بويىنشا جاڭا تاسىلدەرگە بەيىمدەلۋ ءۇشىن 1،5 جىل ىشىندە وتپەلى كەزەڭ ەنگىزىلەتىن بولادى.
قالاداعى جاڭا نىساندار ءۇشىن ديزاين-كودتىڭ ۇسىنىستار مەن تالاپتاردىڭ تولىق كولەمى قولدانىلاتىن بولادى. قولدانىستاعى بار نىساندارمەن كەشەندى تۇردە جۇمىس وتكىزەمىز. كاسىپكەرلەردى ءوز ەركىمەن جانە بەلسەندى تۇردە ديزاين-كود قاعيداتتارىن ەنگىزۋ جانە سول ارقىلى قالامىزدىڭ كەلبەتىن جاقسارتۋ ءۇشىن ىنتالاندىرۋ شارالارىن ۇسىنامىز.
ديزاين-كودتىڭ بولەك سەرۆيس-سايتى ازىرلەندى. بۇل اقپارات، رەسۋرستار جيناۋعا جانە ءبىلىم الماسۋعا ارنالعان ورتالىق الاڭ. سونىمەن قاتار، اتالعان سايت ديزاين-كودتى ەنگىزۋ بارىسىندا ديالوگ الاڭى رەتىندە قولدانىلاتىن بولادى.
ديزاين-كودتى ازىرلەۋ كەزىندە بارلىق نورماتيۆتىك-قۇقىقتىق تالاپتار ورىندالعانىن اتاپ وتكەن ءجون.
نورماتيۆتىك-قۇقىقتىق اكتىلەردى ازىرلەۋ قاعيدالارىنا سايكەس، ءبىز «اتامەكەن» وڭىرلىك كاسىپكەرلەر پالاتاسىنىڭ، الماتى قالاسىنىڭ قوعامدىق كەڭەسىنىڭ، كاسىپكەرلىك جانە ينۆەستيسيالار باسقارماسى جانىنداعى ساراپتامالىق كەڭەستىڭ وڭ قورىتىندىلارىن الدىق.
قاتىسۋشىلاردىڭ پىكىرلەرى مەن مۇددەلەرىن جان-جاقتى ەسەپكە الۋ الماتى قالاسىنىڭ ديزاين-كودى كەشەندى جانە تەڭدەستىرىلگەن قۇجات رەتىندە قالىپتاسۋىنا ىقپال ەتتى.