جاڭا قۇجاتتى جىل سوڭىنا دەيىن اياقتاۋ كوزدەلگەن
الماتى قالاسى مەن اگلومەراسياسىن دامىتۋعا ارنالعان ورتاق جاڭا باس جوسپار جاسالادى. بۇل تۋرالى بۇگىن قالا اكىمى ەربولات دوسايەۆ قالا قۇرىلىسشىلارى فورۋمىندا مالىمدەدى، دەپ حابارلايدى Almaty-akshamy.kz Almaty.tv–گە سىلتەمە جاساپ.
ول 2040 جىلعا دەيىنگى مەرزىمدى قامتيدى. جاڭا قۇجاتتى جىل سوڭىنا دەيىن اياقتاۋ كوزدەلگەن. مەگاپوليس باسشىسى بىلىكتى ساۋلەتشىلەرمەن قالانى ودان ءارى دامىتۋ جايىن جانە الدا تۇرعان سىن-قاتەرلەردى تالقىلادى. قالا قۇرىلىسىنان بولەك، الماتى اگلومەراسياسىنا ءمان بەرۋ كەرەكتىگى ايتىلدى. اكىمنىڭ سوزىنشە، بۇگىندە قالا مەن قالا ماڭىنداعى اۋماقتاردى بىردەي دامىتۋ ماڭىزدى. اسىرەسە كولىك ينفراقۇرىلىمىن جەتىلدىرۋ كەرەكتىگى ءسوز بولدى. جاڭا باس جوسپاردا اگلومەراسيانىڭ ۋرباندالۋ پروسەسىن جەدەلدەتۋ تەتىكتەرى دە قاراستىرىلماق.
«بىرنەشە جىل بويى الماتى اكىمدىگى باس جوسپارعا تۇزەتۋلەر ەنگىزۋگە جۇمىس جاسادى. ۇلكەن جۇمىس اتقارىلدى. ءبىراق ول باس جوسپار بۇرىنعى 2002 جىلعى جوسپارلاردى بازا رەتىندە العان. ودان بەرى جيىرما جىل ءوتتى. ءقازىر قالا دا، ەكونوميكا دا، الماتى وبلىسى دا وزگەردى. سوندىقتان مەن جوسپاردى جاقسارتۋعا اتسالىسقان ازاماتتارعا العىس ايتقىم كەلەدى»، – دەدى الماتى قالاسىنىڭ اكىمى ەربولات دوسايەۆ.
الماتىدا قۇرىلىسشىلار كەڭەسى قايتا قۇرىلادى. ول اكىمدىككە تيەسىلى بولمايدى، ءبىراق كاسىبي مامانداردان جاساقتالىپ، قۇرىلىسقا قاتىستى كەڭەس بەرەتىن الاڭ بولماق. قالا قۇرىلىسشىلار وداعى پرەزيدەنتىنىڭ ايتۋىنشا، بۇل مەگاپوليستىڭ ماسەلەلەرىن شەشۋگە جانە تۇرعىندارعا جايلى ورتا قالىپتاستىرۋ ءۇشىن قىزمەت ەتەدى. دۇرىس قالا قۇرىلىسى ساياساتىن جۇرگىزۋگە مۇمكىندىك بەرمەك.
«اكىمدىك جانىندا بۇرىن قۇرىلىسشىلاردان قۇرىلعان كەڭەس بولاتىن. وندا كاسىبي ساۋلەتشىلەر قالا قۇرىلىسىنا قاتىستى جوبالارىن تالقىلاپ، ەلەكتەن وتكىزەتىن. ءۇش جىلدان كەيىن كەڭەس قايتا جۇمىسىن باستايتىن بولدى»، – دەدى «قازاقستان قالا قۇرىلىسشىلارى وداعى» قوعامدىق بىرلەستىگىنىڭ پرەزيدەنتى ليۋبوۆ نىسانبايەۆا.