الماتىدا «الماتى – ءبىزدىڭ ورتاق ءۇيىمىز» ناۋقانى باستالدى، ونىڭ اياسىندا قالانىڭ بارلىق اۋدانىندا رۇقسات ەتىلمەگەن جارناما جويىلادى.
اۋەزوۆ اۋدانىندا كاسىپكەرلىكتى جانە ونەركاسىپتى دامىتۋ ءبولىمى «الماتى - ءبىزدىڭ ورتاق ءۇيىمىز» ەكوناۋقانى اياسىندا رۇقسات ەتىلمەگەن جارنامانى جويۋ ماسەلەسى بويىنشا بيزنەس نىساندارىنا ءتۇسىندىرۋ جۇمىستارىن جۇرگىزدى. اكىمدىك قىزمەتكەرلەرى 251 نىساندى ارالادى، دەپ حابارلايدى Almaty-akshamy.kz.
تۇركسىب اۋدانىندا رۇقسات ەتىلمەگەن جارنامانى جويۋ جانسۇگىروۆ، بەكماحانوۆ، ىلە تراكتىسى، شەمياكين كوشەلەرىندە جۇرگىزىلەدى. ادەتتە، رۇقسات ەتىلمەگەن جارناما ءدامحانالار، دۇكەندەر جانە ت.ب. كاسىپكەرلىك نىساندارىنىڭ جانىندا ورناتىلادى. بارلىعى 200 نىسان قامتىلدى.
الاتاۋ اۋدانىندا رۇقسات ەتىلمەگەن جارنامانى جويۋ ءۇشىن 100-دەن استام ادام، سونداي-اق 50-دەن استام تەحنيكا جۇمىلدىرىلدى. سونىمەن قاتار، 3 بريگادا ايالدامالاردى بوياۋمەن جانە جۋۋمەن اينالىسادى.
جەتىسۋ اۋدانىندا سولتۇستىك اينالما كوشەسى، رايىمبەك داڭعىلى، رىسقۇلوۆ داڭعىلى بويىنشا رۇقسات ەتىلمەگەن جارنامالاردى جويۋ جۇمىستارى جۇرگىزىلۋدە. شامامەن 30-40 ادام اتسالىسادى.
ناۋرىزباي اۋدانىندا جاندوسوۆ كوشەسىنىڭ بويىندا كاسىپ يەلەرى 20-دان استام جارنامالىق باننەردى الىپ تاستادى.
بارلىق اقپارات almaty.kz سايتى مەن الماتى اكىمدىگىنىڭ الەۋمەتتىك جەلىلەرىندەگى پاراقشالارىندا جاريالانادى. سونداي-اق، قالاداعى باننەر، پلاكات جانە افيشالارداعى ارنايى QR-كود ارقىلى ۆەب-سايتقا كىرۋگە بولادى.
