15 قاراشا كۇنى الماتى قالاسىندا قازاقستان قارجىگەرلەرىنىڭ XI كونگرەسى وتەدى.
وندا «سيفرلىق تەڭگە» جوباسىن ىسكە اسىرۋ قورىتىندىلارى تانىستىرىلادى، دەپ حابارلايدى Almaty-akshamy.kz
اتالعان شارانى ق ر ۇلتتىق بانكىنىڭ جانە قارجى نارىعىن رەتتەۋ جانە دامىتۋ اگەنتتىگىنىڭ قولداۋىمەن قازاقستان قارجىگەرلەرى قاۋىمداستىعى ۇيىمداستىرۋدا.
قارجىگەرلەر كونگرەسىنىڭ پانەلدىك سەسسيالارىندا شەتەلدىك ورتالىق بانكتەر مەن قارجى ينستيتۋتتارىنىڭ باسشىلارى، قازاقستاندىق مەملەكەتتىك ورگاندار مەن قارجى ۇيىمدارىنىڭ وكىلدەرى ماكروەكونوميكالىق ساياسات پەن قارجى سەكتورىنىڭ وزەكتى ماسەلەلەرىن تالقىلايدى.
سونىمەن بىرگە، بيىل قاتىسۋشىلار قازىرگى جاعدايداعى اقشا-كرەديت ساياساتىن، ماكروەكونوميكالىق تۇراقتىلىق جانە فيسكالدىق ءتارتىپ ماسەلەلەرىن، وعان قوسا، قارجى سەكتورىنىڭ كيبەرتۇراقتىلىعى مەن قارجى نارىقتارىنىڭ جاھاندىق وزگەرۋىندەگى يننوۆاسيالاردىڭ ءرولى تاقىرىپتارىن قاراستىرماق.
بۇدان بولەك، كونگرەسس اياسىندا «سيفرلىق تەڭگە» جوباسىن ىسكە اسىرۋ قورىتىندىلارىنىڭ تانىستىرىلىمى وتەدى.
قازاقستان قارجىگەرلەرىنىڭ كونگرەسى ونلاين جانە وففلاين فورماتتا ۇيىمداستىرىلادى. پلەنارلىق سەسسيالار مەن پانەلدىك پىكىرتالاستاردىڭ ونلاين ترانسلياسياسى fincongress.kz سايتىندا جانە «قازاقستان ۇلتتىق بانكى» اتتى رەسمي YouTube كانالىندا كورسەتىلەدى.
ەسكە سالا كەتسەك، وتكەن جىلى قارجىگەرلەردىڭ مەرەيتويلىق ح كونگرەسىندە ەكونوميكانى كرەديتتەۋدەگى جۇيەلى تاسىلدەر، قارجى جانە ناقتى سەكتوردىڭ ءوزارا ءىس-قيمىلى، ساقتاندىرۋ نارىعىن دامىتۋ، قارجىلىق قولجەتىمدىلىككە سيفرلىق ءتاسىل ماسەلەلەرى جانە قور نارىعىنداعى جاڭا ينۆەستيسيالىق مۇمكىندىكتەر قارالعان ەدى.