ايتۆ-عا ءوزىن ءوزى تەستىلەۋ ەنگىزىلگەن ەكى جىلدا 6 مىڭنان استام الماتىلىق وسى قىزمەتتى قولدانىپ، وزدەرىنىڭ ايتۆ-مارتەبەسىن ءبىلدى، دەپ حابارلايدى aqshamnews.kz.
ايتۆ-عا ونلاين تۇردە ءوزىن-وزى تەستىلەۋ، اسىرەسە حالىقتىڭ نەگىزگى توپتارى (ەركەكتەرمەن جىنىستىق قاتىناستاعى ەركەكتەر، ينەكسيالىق ەسىرتكىنى تۇتىناتىن ادامدار، ترانسگەندەرلىك ادامدار) اراسىندا تەستىلەۋمەن قامتۋدى كەڭەيتۋدىڭ ءتيىمدى قۇرالى بولىپ تابىلادى.
«تەستتەر قولدانۋ ءۇشىن قاراپايىم جانە كۇردەلى مانيپۋلياسيالاردى قاجەت ەتپەيدى، سونىمەن بىرگە ولاردىڭ سەزىمتالدىعى جوعارى جانە ايتارلىقتاي ءدال ناتيجە بەرەدى»، - دەپ الماتى قالاسى قدب «جيتس الدىن الۋ جانە وعان قارسى كۇرەس ورتالىعىنىڭ» ديرەكتورى مارات توكەيەۆ تۇسىندىرەدى.
ارنايى ونلاين سەرۆيسى ارقىلى تەستتەرگە تەگىن جانە جاسىرىن تۇردە تاپسىرىس بەرۋگە بولادى، سونداي-اق، تەستتەر الماتى جيتس ورتالىعىندا جانە ۇەۇ دا قولجەتىمدى. سۇراقتار تۋىنداعان جاعدايدا كليەنتتەرگە قولداۋ كورسەتۋ جانە كەڭەس بەرۋ قىزمەتى بار. ەگەر تەست وڭ ناتيجە بەرسە - جيتس ورتالىعىنىڭ مامانداندىرىلعان زەرتحاناسىندا قوسىمشا تەكسەرۋدەن مىندەتتى تۇردە ءوتۋ قاجەت.
ءوزىن-وزى تەستىلەۋ - بۇل جۇقتىرۋ ءقاۋپى بار كەز-كەلگەن ادام پايدالانا الاتىن دەنساۋلىققا قاتىستى تاعى ءبىر قۇقىق. ايتۆ-عا قارسى ءىس-قيمىلداعى جەتىستىكتەر ادام قۇقىقتارىن قورعاۋ جانە دەنساۋلىق ساقتاۋ جۇيەسىن نىعايتۋ سالاسىنداعى پروگرەسپەن تىعىز بايلانىستى.
20 قاراشادان 1 جەلتوقسانعا دەيىن (دۇنيەجۇزىلىك جيتس-كە قارسى كۇرەس كۇنى) الماتىدا «دۇرىس جولدى – ادام قۇقىقتارىنىڭ جولىن تاڭداڭىز» يۋنەيدس ۇرانىمەن ناۋقان وتەدى. ءار ادامنىڭ قۇقىقتارىن ساقتاۋ ايتۆ-عا ءتيىمدى توتەپ بەرۋدىڭ نەگىزى بولىپ تابىلادى. بۇل دۇنيەجۇزىلىك جيتس-كە قارسى كۇرەس كۇنى - ءاربىر ادامنىڭ قۇقىعىن قورعاۋ ارقىلى ءاربىر ادامنىڭ دەنساۋلىعىن قورعاۋعا شاقىرۋ بولىپ ەسەپتەلەدى.
بۇگىنگى تاڭدا، قازاقستاندا ايتۆ-مەن ءومىر سۇرەتىن ادامدار انتيرەتروۆيرۋستىق تەراپيانى تەگىن الۋدا. الماتىدا جاناسۋعا دەيىنگى پروفيلاكتيكا قىزمەتى (جدپ) جۇزەگە اسىرىلادى. دوستىق كابينەتتەرىندە حالىقتىڭ نەگىزگى توپتارىنا جاتاتىن 728 ادام ددۇ-نىڭ نۇسقاۋلارىن سايكەس جدپ-نى الىپ جاتىر. جۇكتى ايەلدەر ايتۆ-عا تەكسەرۋدەن ەكى رەت وتە الادى، تەكسەرۋ وڭ ناتيجە بەرگەندە ەمدەۋدى ۋاقىتىلى باستاپ، دەنى ساۋ بالانى جارىققا اكەلە الادى.
ناۋقان كۇندەرى - 1 جەلتوقسانعا قاراي الماتىدا ايتۆ-نىڭ الدىن الۋ، ايتۆ-عا شالدىققان ادامدارعا ستيگما مەن كەمسىتۋشىلىككە جول بەرمەۋ تۋرالى ءبىلىمدى ناسيحاتتاۋ بويىنشا اكسيالار، دوڭگەلەك ۇستەلدەر، فلەشموبتار جانە باسقا دا ءىس-شارالار وتەدى. الماتى «قايرات» فۋتزال كلۋبىنىڭ جانكۇيەرلەرى، بيزنەس-قۇرىلىمداردىڭ قىزمەتكەرلەرى مەن بىلىمگەرلەر ءۇشىن ەكسپرەسس- تەستىلەۋ اكسيالارى جوسپارلانۋدا. «الماتى- 1» تەمىرجول ۆوكزالى مەن حالىقارالىق اۋەجايدىڭ جولاۋشىلارى ايتۆ-نىڭ الدىن الۋ تۋرالى بەينەروليكتەردى كورە الادى. ايتۆ – مەن ءومىر سۇرەتىن ادامدار ءۇشىن دەرماتولوگ، ماممولوگ، فتيزياتر، ونكولوگ ءتارىزدى ارنايى مامانداردىڭ كەڭەستەرى ۇيىمداستىرىلادى. ءجيتس-تىڭ الدىن الۋ جانە وعان قارسى كۇرەس ورتالىعىندا حالىق ءۇشىن «اشىق ەسىك كۇنى» وتەدى. ءاربىر نيەت ءبىلدىرۋشى مامانداردان كەڭەس الىپ، ايتۆ-عا تەكسەرۋدەن وتە الادى.