الاتاۋ اۋدانىنداعى وقۋشىلاردىڭ يننوۆاسيالىق شىعارماشىلىق ورتالىعىندا الماتى قالاسى ءبىلىم باسقارماسىنىڭ القا وتىرىسى ءوتتى. القا وتىرىسى ءبىلىم باسقارماسىنىڭ باسشىسى سايران سايفەدەنوۆتىڭ توراعالىعىمەن ۇيىمداستىرىلدى، دەپ حابارلايدى Aqshamnews.kz ءتىلشىسى.
القا جۇمىسىنا ورتا ءبىلىم بەرۋ ۇيىمدارىنىڭ، قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى، پسيحولوگيالىق قولداۋ ورتالىعى، قالالىق دەنە شىنىقتىرۋ جانە سپورت وقۋ-تاجىريبەلىك ورتالىعىنىڭ باسشىلارى مەن ماماندارى قاتىستى.
الماتى قالاسى ءبىلىم باسقارماسىنىڭ ورتا ءبىلىم بەرۋ ءبولىمىنىڭ باسشىسى اقمارال ايتۋاروۆا ءبىلىم ساپاسى بويىنشا قورىتىندى ەسەپپەن تانىستىردى.
پەداگوگتەردىڭ بىلىكتىلىگىن ارتتىرۋ، كادرلاردى دايارلاۋ بويىنشا ءقبجتعاو ديرەكتورىنىڭ مىندەتىن ۋاقىتشا اتقارۋشى ساندۋعاش اتەيبەك بايانداما جاسادى.
وقۋشىلاردىڭ سپورتتاعى نەگىزگى جەتىستىكتەرىن قالالىق دەنە شىنىقتىرۋ جانە سپورت وقۋ-تاجىريبەلىك ورتالىعىنىڭ باسشىسى باحتيار ەلەمەسوۆ ۇسىندى.
پسيحولوگيالىق قولداۋ ورتالىعىنىڭ ديرەكتورى ۆەنەرا قوقانوۆا كامەلەتكە تولماعاندارعا قاتىستى بۋللينگ، زورلىق-زومبىلىق، سۋيسيد، وزىنە-وزى زيان كەلتىرۋدىڭ الدىن الۋ بويىنشا جۇرگىزىلگەن جۇمىستاردىڭ قورىتىندىسىن تانىستىردى.
القا وتىرىسىندا «ماقساتتى مەكتەپتەر» جوباسى اياسىندا پەداگوگيكالىق شەبەرلىك ورتالىعى مەن Shoqan Academy-دە مۇعالىمدەردى قايتا دايارلاۋ كۋرستارىندا پەداگوگتەردىڭ بىلىكتىلىگىن ارتتىرۋ ناتيجەلەرى ايتىلدى.
سونداي-اق، ورتا ءبىلىم بەرۋ ۇيىمدارىندا ورىن تاپشىلىعىن ازايتۋ مەن جاعدايدى جاقسارتۋ باعىتىندا وڭ وزگەرىستەردىڭ بار ەكەنى اتاپ ءوتىلدى. اتاپ ايتقاندا، قوسىمشا قۇرىلىس جۇرگىزۋ، مەكتەپتەردى كۇردەلى جوندەۋدەن وتكىزۋ بەلسەندى تۇردە قولعا الىنعان، جاڭا زاماناۋي مەكتەپتەردى جاڭا وقۋ جىلىندا پايدالانۋعا بەرۋ جوسپارلانۋدا.
جىلىتۋ ماۋسىمىنا دايىندىقتى ۋاقتىلى قامتاماسىز ەتۋ ماقساتىندا الماتى قالاسى ءبىلىم باسقارماسىنىڭ باسشىسى مەكتەپ ديرەكتورلارىنا 20 تامىزعا دەيىن دايىندىق اكتىلەرىن وتكىزۋدى تاپسىردى.
القا وتىرىسى بارىسىندا ءبىلىم باسقارماسىنىڭ باسشىسى ءبىلىم بەرۋ جۇيەسىن دامىتۋ جانە جاڭعىرتۋ، يننوۆاسيالىق تەحنولوگيالاردى ەنگىزۋ، ادىستەمەلىك قامتاماسىز ەتۋدى جەتىلدىرۋ جۇمىستارىن جالعاستىرۋدى تاپسىردى.
سايران سايفەدەنوۆ وقۋشىلاردىڭ ۇلگەرىمىن ارتتىرۋعا ۇنەمى نازار اۋدارۋ قاجەتتىگىن اتاپ ءوتتى. سونىمەن قاتار، مەكتەپتى اياقتاعاننان كەيىن دە وقۋشىلارمەن بايلانىستا بولىپ، ولاردىڭ جوعارى وقۋ ورىندارىنا ءتۇسۋى مەن بولاشاقتا جۇمىسقا ورنالاسۋىنا جاعداي جاساۋ ماڭىزدى ەكەنىن ايتتى.
سونداي-اق، الماتى قالاسى وقۋشىلارىنىڭ جازعى دەمالىس كەزەڭىندەگى بوس ۋاقىتىن ءتيىمدى ۇيىمداستىرۋ، اتا-انالار تاراپىنان باقىلاۋدى قامتاماسىز ەتۋ، بالالار مەن جاسوسپىرىمدەردىڭ قاۋىپسىزدىگىن قامتاماسىز ەتۋ شارالارى اياسىندا مونيتورينگ جۇرگىزۋدى تاپسىردى.