الماتىدا ەرەكشە قاجەتتىلىكتەرى بار ادامدار تەاتر ونەرىن تەگىن مەڭگەرە الادى. «الاتاۋ» ءداستۇرلى ونەر تەاترى مۇمكىندىگى شەكتەۋلى جاندارعا ارنالعان 10 ينكليۋزيۆتى ۇيىرمە ۇسىنۋدا. وندا قاتىسۋشىلار بي، ءان ايتۋ، ىم تىلىندە ءان ورىنداۋ، كلوۋنادا، ەستۋ قابىلەتى بۇزىلعان، ءىم-تىلىن مەڭگەرگەن جاندارعا ارنالعان داكتيلولوگيا ساباقتارىنا قاتىسا الادى. بۇل تۋرالى الماتى قالاسى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا «الاتاۋ» ءداستۇرلى ونەر تەاترىنىڭ ديرەكتورى ماقسات نۇرالييەۆ مالىمدەدى، دەپ حابارلايدى aqshamnews.kz
سونىمەن قاتار، ول جوعارى ناتيجەلەر كورسەتكەن قاتىسۋشىلار شىعارماشىلىق ۇجىم قۇرامىنا ەنىپ، الماتىلىق تەاتر ساحناسىندا ونەر كورسەتۋگە، سونداي-اق حالىقارالىق بايقاۋلارعا قاتىسىپ، ءوز تالانتىن الەمدىك دەڭگەيدە تانىتۋعا مۇمكىندىك الاتىنىن دا اتاپ ءوتتى.
«ساباقتار اپتاسىنا 3 رەت، 2 ساعاتتان وتەدى، ولاردى تەاتر ارتىستەرى مەن زاعيپ جانە ەستۋ قابىلەتى ناشار جاندار قاۋىمداستىعىنىڭ جەتەكشىلەرى جۇرگىزەدى. ءبىزدىڭ ستۋديا-ۇيىرمەلەرىمىزدە شامامەن 200 ادام ءبىلىم الادى. سونىمەن قاتار، الماتى قالاسى مادەنيەت باسقارماسىنىڭ قولداۋىمەن 130 ءىس-شارا وتكىزدىك. ولاردىڭ قاتارىندا ەرەكشە قاجەتتىلىكتەرى بار جاندارعا ارنالعان حالىقارالىق فەستيۆالدەر مەن بايقاۋلار، قايىرىمدىلىق كونسەرتتەرى، دارىستەر مەن مادەنيەت قايراتكەرلەرىمەن كەزدەسۋلەر بار. ءبىز ينكليۋزيۆتى ورتا قالىپتاستىرۋعا ۇمتىلامىز، وندا ونەر ادامدار اراسىنداعى شىنايى بايلانىس كوپىرىنە اينالادى، ال ءبىزدىڭ ارتىستەر – رۋح مىقتىلىعى مەن شەكسىز مۇمكىندىكتەردىڭ ايقىن ۇلگىسى. بۇگىندە بىزدە يتاليا، تۇركيا، قىرعىزستان، تاجىكستان جانە مالايزيادا وتكەن حالىقارالىق بايقاۋلاردىڭ جەڭىمپازدارى مەن لاۋرەاتتارى بار. بۇل جوبالارعا ءبىزدىڭ ارتىستەر اكىمدىكتىڭ قولداۋىمەن قاتىستى»، – دەدى ماقسات نۇرالييەۆ.
اتاپ وتەتىن جايت، «الاتاۋ» ءداستۇرلى ونەر تەاترىندا كورۋ جانە ەستۋ قابىلەتى بۇزىلعان جاندار جۇمىس ىستەيتىن «كورۋ جانە ەستۋ قابىلەتى شەكتەۋلى جاندارعا ارنالعان مادەني دەمالىستى ۇيىمداستىرۋ ءبولىمى» تابىستى قىزمەت ەتۋدە.