بۇل تۋرالى قالالىق ءماسليحاتتىڭ 27-سەسسياسىندا بەلگىلى بولدى
الماتىدا وقۋشىلاردى تاسىمالداۋعا ارنالعان 100 شاقتى جاڭا مەكتەپ اۆتوبۋسى ساتىلىپ الىنادى. مۇعالىمدەر ءۇشىن دە جاقسى جاڭالىق – ولاردىڭ كۇندەلىكتى وقۋ جۇكتەمەسى 18 ساعاتتان 16 ساعاتقا دەيىن قىسقارادى. بۇل تۋرالى قالالىق ءماسليحاتتىڭ 27-سەسسياسىندا بەلگىلى بولدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇگىن دەپۋتاتتار الداعى جىلداعى بيۋدجەتتى ناقتىلاۋعا جينالدى. مالىمەتتەرگە سايكەس، بارلىق سالانى دامىتۋعا جالپى سومماسى 105 ملرد تەڭگەدەن استام قارجى بولىنەدى. ونىڭ 37 پايىزى باسقا جوبالاردىڭ يگەرىلمەگەن قارجىسى ەكەن. مەملەكەتتىك قارىزدى وتەۋگە قىرىق ميللياردقا جۋىق تەڭگە جۇمسالادى.
«مەملەكەتتىك قارىزدى مەرزىمىنەن بۇرىن وتەۋ الداعى ۋاقىتتا سىياقى تۇرىندەگى 2،1 ملرد تەڭگە بيۋدجەت قاراجاتىن ۇنەمدەۋگە مۇمكىندىك بەرەدى. بۇل قاراجات الەۋمەتتىك ماڭىزى بار شارالاردى قولداۋعا جۇمسالادى. بيۋدجەتتەگى باسىم باعىتتاعى جوبالاردى قولداۋ ءۇشىن جەرگىلىكتى بيۋدجەتتى 63،8 ملرد تەڭگەگە ۇلعايتۋ كوزدەلگەن. سونداي-اق مەملەكەتتىك ساتىپ الۋدان ۇنەمدەۋ ەسەبىنەن قامتاماسىز ەتىلەدى»، – دەدى الماتى قالاسى اكىمىنىڭ ورىنباسارى اسقار ءامرين.
سونداي-اق، 4 ميلليارد تەڭگە مەكتەپتەگى ۇستازداردىڭ جالاقىسىن كوتەرۋگە جۇمسالادى. ال تاعى2،5 ميلليارد تەڭگە حالىقتى الەۋمەتتىك قولداۋعا باعىتتالادى. وعان قوسا، الىپ شاھارداعى بالالارعا ارنالعان جەدەل جاردەم كولىگىندەگى وپەراسيالىق بلوكتىڭ قۇرىلىسى جالعاسادى. ول ءۇشىن 1،5 ميلليارد تەڭگە بولىنبەك. كەلەسى جىلى 2 مىڭ زەينەتكەر ءۇشىن ساۋىقتىرۋ جىلى بولماق.
«جالپى دەنساۋلىق ساقتاۋ سالاسىنا 1،8 ملرد تەڭگە بولىنەدى. ونىڭ ىشىندە 346 مۇمكىندىگى شەكتەۋلى جاننىڭ كومەكشىلەرىنە 183،1 ملن.تەڭگە ءبولۋ جوسپارلانىپ وتىر»، – دەدى قالالىق قارجى باسقارماسى باسشىسىنىڭ مىندەتىن اتقارۋشى التىناي تولەۋتايەۆا.