الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى.
الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى. وندا مەگاپوليستى 2025 جىلعا دەيىن دامىتۋدىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار كورسەتىلگەن. قالا تۇرعىندارى باعدارلامامەن تانىسىپ، ءوز ۇسىنىستارىن «الماتىنى دامىتۋ ورتالىعىنىڭ» سايتىندا 2022 جىلدىڭ 1 شىلدەسىنە دەيىن قالدىرا الادى. بۇل تۋرالى الماتى قالاسى قوعامدىق كەڭەس مۇشەسى بوريس دجاپاروۆ پىكىر ءبىلدىردى، دەپ حابارلايدى Almaty-akshamy.kz.
«الماتى قالاسىنىڭ 2025-2030 جىلدارعا دەيىنگى ورتا مەرزىمدى دامۋ جوسپارلارىنىڭ جوباسىمەن قالا جۇرتشىلىعىن حاباردار ەتكەن قالا اكىمى ەربولات دوسايەۆ نەگىزگى باسىمدىلىقتاردىڭ قاتارىنا قوعامدىق ترانسپورت ماسەلەلەرىن قويىپ وتىر. كوپشىلىكتىڭ كوڭىلىنەن شىعاتىن جوسپارلى مەجەلەر قالاداعى قوعامدىق كولىكتەردىڭ بارلىق تۇرلەرىن قامتىعان دەسەك، قاتەلەسپەسبىز. اسىرەسە، «الماتى ارەنا» مەن «حالىق ارەنا» اراسىن تولە بي كوشەسى ارقىلى قوساتىن جەڭىل رەلستى ترانسپورت، جاڭادان اشىلاتىن ەلەكتر كۇشى جانە گازبەن جۇرەتىن 5 اۆتوبۋس پاركتەرى مەن 5 گاز قۇيۋ بەكەتتەرىن، جۇزدەگەن جاڭا اۆتوبۋستار، قالا كىرە بەرىستەرىندەگى 4 جاڭا پاركينگ الاڭدارى مەن كولىك-حابتارىنىنىڭ قۇرىلىسى، قالا ورتالىعىنان ۇلكەن الماتى اينالمالى اۆتوجولىنا تىكەلەي شىعاتىن 10-عا جۋىق راديالدى كوشەلەردى جانە تاعى باسقا جولداردى سالۋ، ت.ب.
ارينە، جاڭا مۇمكىندىكتەرمەن قاتار جاڭا ماسەلەلەر مەن كەدەرگىلەر دە تۋىندايتىنى انىق. سول سەبەپتەن قالا اكىمى قالا تۇرعىندارىنا ۇسىنىلىپ وتىرىلعان جوبالاردى بەلسەنە تالقىلاپ، كەلەسى ايدىڭ 5-نە دەيىن ءوز ۇسىنىستارىن رەسمي بىلدىرۋگە شاقىردى.
"بىرگە پىشكەن تون كەلتە بولماس" دەگەن. وسىعان وراي بارشا الماتىلىقتاردى قوعامدىق كولىكتىڭ الدىمىزداعى 8 جىلعا ارنالعان دامۋ جوسپارىمەن جەتە تانىسىپ، ءوز ويلارىڭىزدى اشىق بىلدىرۋگە شاقىرامىز"، – دەدى ول.
ايتا كەتەيىك، الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى. جوبا جەتى بولىمنەن تۇرادى، ولار: «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «ءقاۋىپسىز قالا».
الماتىنى كەڭىستىكتىك دامىتۋدىڭ نەگىزگى مىندەتى – جايلى قالالىق ورتا قۇرۋ جانە قالانىڭ بارلىق اۋداندارىندا ءومىر ءسۇرۋ ساپاسىن ارتتىرۋ. ول ءۇشىن ءۇش باسىم باستاما ايقىندالدى: الماتىنى كوپورتالىقتى دامىتۋ، قوعامدىق كولىكتىڭ دامىعان جۇيەسى جانە اۋدانداردىڭ بايلانىستىلىعى، جاڭا تاريفتىك ساياساتتى ەنگىزۋ جانە شىعىنداردى ازايتۋ ارقىلى تكش قىزمەتتەرىنىڭ ساپاسىن جاقسارتۋ.