الماتى پوليسياسى ءوز قىزمەتكەرلەرىن قالاي باقىلايدى
الماتى پوليسياسى ءوز قىزمەتكەرلەرىن قالاي باقىلايتىندىعى تۋرالى ايتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
قىزمەتتىك مودەلدى ەنگىزۋ، “پوليسيا جاقىن ماڭدا” قاعيداتىن، سونداي-اق مەملەكەت باسشىسىنىڭ پوليسيا عيماراتىندا، قالالىق پد-دە ۇزدىكسىز بەينەباقىلاۋ جۇيەسىن ەنگىزۋ تۋرالى تاپسىرماسى بويىنشا كونسۋلتاتيۆتىك-كەڭەسشى ورگاننىڭ، ب ا ق وكىلدەرى مەن بلوگەرلەردىڭ قاتىسۋىمەن كىرىسپە تۇساۋكەسەر ءوتتى.
«بۇگىنگى تاڭدا الماتى قالاسى پوليسياسىنىڭ اكىمشىلىك عيماراتتارىندا 420 بەينەباقىلاۋ كامەرالارى ورناتىلدى، ولاردىڭ كوپشىلىگى تەرگەۋ ارەكەتتەرى جۇرگىزىلىپ، ازاماتتارمەن جۇمىس جۇرگىزىلەتىن تەرگەۋشىلەر، انىقتاۋشىلار جانە كريمينالدىق پوليسيا قىزمەتكەرلەرىنىڭ كابينەتتەرىندە ورنالاسقان. ءسىز ءقازىر كورىپ وتىرعانىڭىزداي، ناقتى ۋاقىت رەجيمىندە جاعدايدى باقىلاي الاسىز. بۇل بەينەباقىلاۋ كامەرالارىنىڭ دەرەكتەرى جازىلادى جانە قاجەت بولعان جاعدايدا مۇراعاتتان سۇراۋعا بولادى. جاقىن ارادا اكىمشىلىك قاماۋعا الىنعاندارعا جانە جەكە باسىن كۋالاندىراتىن قۇجاتتارى جوق تۇلعالارعا ارنالعان قابىلداپ–تاراتۋدى دا بەينەباقىلاۋ كامەرالارىمەن جابدىقتاۋ جوسپارلانۋدا. كەلەسى جىلى بارلىق ۋچاسكەلىك پوليسيا پۋنكتتەرىندە بەينەكامەرالار ورناتىلادى»، – دەدى الماتى قالالىق پوليسيا دەپارتامەنتىنىڭ باسشىسى قانات تايمەردەنوۆ.
سونداي-اق سپيكەر بۇگىنگى تاڭدا 42 ستاسيونارلىق مودۋلدىق پوستتا ورناتىلعان بەينەباقىلاۋ جۇيەسى ارقىلى پوليسيا قىزمەتكەرلەرىنىڭ جۇمىسىن تالداۋعا مۇمكىندىگى بار ەكەنىن، جانە جىل سوڭىنا دەيىن تاعى جەتەۋىن ورناتۋ جوسپاردا ەكەندىگىن ايتتى.