الماتى قالاسى بويىنشا قاج دەپارتامەنتىنىڭ قاۋىپسىزدىگى بارىنشا تومەن №13 مەكەمەسىندە 372 ورىندىق جاتاقحانا، 120 ورىندىق اسحانا جانە 48 ورىندىق شايحاناسى بار جاڭا عيمارات پايدالانۋعا بەرىلدى.
جاڭا عيمارات مونشا-كىر جۋۋ كەشەنىمەن جابدىقتالعان، دەپ حابارلايدى aqshamnews.kz Polisia.kz-كە سىلتەمە جاساپ.
اتالعان عيمارات سوتتالعانداردى ۇستاۋ جاعدايىن جاقسارتۋ جانە جازانى ورىنداۋ جۇيەسىن مودەرنيزاسيالاۋ ماقساتىندا سالىندى. ابايسىزدا قىلمىس جاساعاندار جازاسىن وتەيتىن قاۋىپسىزدىگى بارىنشا تومەن مەكەمەدەگى جاڭا مودۋلدى عيماراتقا 156 بەينەكامەرا ورناتىلىپ، سوتتالعاندار جاتاتىن بولمەلەر ەكى قاباتتى توسەكتەرمەن، كۇندەلىكتى تۇرمىسقا قاجەتتى جيھازدارمەن جانە سالقىنداتقىش قۇرىلعىلارمەن جابدىقتالدى. سوتتالعاندارعا ارنالعان اسحانا مەن شايحانا دا اس دايىنداۋعا قاجەتتى قۇرال-جابدىقتارمەن، ۇستەل جانە ورىندىقتارمەن تولىقتاي جابدىقتالىپ، سوتتالعانداردىڭ بوس ۋاقىتتارىندا دەمالۋلارىنا جانە كىتاپ وقىپ، تەلەديدار كورۋلەرىنە ارنالعان بولمەلەرگە دە كەرەكتى جيھازدار قويىلدى. جاڭا عيماراتتا مەكەمە قىزمەتكەرلەرىنىڭ دە جۇمىس ىستەۋىنە قولايلى جاعداي جاسالعان.