ءىس-شارانى قوعامدىق دامۋ باسقارماسىنىڭ «Civil Center Almaty» مەملەكەتتىك الەۋمەتتىك تاپسىرىس جوباسىن ىسكە اسىرۋ اياسىندا «اقپاراتتىق-رەسۋرستىق ورتالىق» قق وتكىزدى.
اتالعان جوبا ۇكىمەتتىك ەمەس ۇيىمداردىڭ (ۇەۇ)، مەملەكەتتىك ورگاندار مەن جەرگىلىكتى ءوزىن-وزى باسقارۋ كوميتەتتەرىنىڭ ءتيىمدى ءوزارا ءىس-قيمىلىن دامىتۋ، ىنتىماقتاستىعىن كەڭەيتۋ ماقساتىن كوزدەيدى، دەپ حابارلايدى aqshamnews.kz
باسقوسۋعا جەرگىلىكتى اتقارۋشى، ءبىلىم بەرۋ مەن قۇقىق قورعاۋ ورگاندارى قىزمەتكەرلەرى قاتىستى. «اشىق ەسىك كۇنى» – بۇل ۇەۇ-عا قوعاممەن بايلانىس ورناتۋ، ونى تەرەڭدەتۋ، ماقساتتى توپقا (حالىق) ۇكىمەتتىك ەمەس ۇيىمداردىڭ قىزمەتى جونىندە حاباردار ەتۋ مەن ولاردىڭ ماڭىزدى جۇمىسىن قولداۋعا تاماشا مۇمكىندىك. جەتەكشى قوعامدىق قورلاردىڭ سپيكەرلەرى قور قىزمەتىنىڭ ۇيىمداستىرىلۋى، الەۋمەتتىك ماسەلەنى شەشۋ جولىن اڭگىمەلەدى.
جيىندا وسى ماسەلەلەرگە بايلانىستى قالامىزداعى كوپتەگەن قوعامدىق قوردىڭ نەندەي شارۋامەن اينالىساتىنى ناقتىلى ايتىلىپ، كورسەتىلدى. بۇل كۇنى ادامدارعا قورلاردىڭ جۇمىسىن ىشتەن كورۋگە مۇمكىندىك بەرىلدى. ءاربىر قورمەن مىندەتتى تۇردە تانىسىپ، قالامىزدىڭ تىنىس-تىرشىلىگىن جاقسارتۋ ورايىندا بىرلەسكەن ءارى پايدالى تاجىريبە جيناقتاۋ ءۇشىن ءوزارا بايلانىس ورناتۋ قاجەت. الماتىلىق كوممەرسيالىق ەمەس ۇيىمدار ءوز كەزەگىندە اۋداننىڭ جەرگىلىكتى مەملەكەتتىك قۇرىلىمدارىنىڭ وكىلدەرىمەن جاقىنىراق تانىسىپ، ءبىلىستى، كەڭەس الدى.
«بۇگىنگى اۋەزوۆ اۋدانى كوميۋنيتي ورتالىعى الاڭىنداعى ۇەۇ ۇيىمداستىرعان «اشىق ەسىك كۇنىندەگى» ءبىزدىڭ مىندەت – جەرگىلىكتى اتقارۋشى بيلىك ورگاندارىنا، قۇقىق قورعاۋ ورگاندارى مەن ۇكىمەتتىك ەمەس ۇيىم وكىلدەرىنە الەۋمەتتىك ماڭىزدى ماسەلەلەردى شەشۋدە ۇەۇ كورسەتەتىن قىزمەت كورسەتۋلەردى ءتۇسىندىرۋ. ءبىز بۇگىن «باقىتتى وتباسى»، «بەلسەندى ءومىر ءسۇرۋ»، «ناركوستوپ»، «ەكولوگيالىق تاربيە»، «تۇرمىستىق زورلىق-زومبىلىقتىڭ الدىن الۋ»، «ايەلدەر مەن بالالاردى زورلىقتان قورعاۋ قۇقىعى» مەن لۋدومانيا جونىندەگى ماسەلەلەردى، تۇرمەدەن بوساتىلعان ايەلدەردىڭ الەۋمەتتىك ماسەلەسىن، وكپە دەرتى سەكىلدى الەۋمەتتتىك سىرقاتتىڭ جاي-كۇيىن قاراستىرىپ، تالقىلاپ، ولاردى زاڭدىلىقپەن شەشۋ جولدارىن تۇسىندىردىك. ايتا كەتەرىمىز، ۇكىمەتتىك ۇيىم تاراپىنان كورسەتىلەتىن وسى قىزمەتتىڭ ءبارى تەگىن تۇردە كورسەتىلەدى. ماقسات – حالىقپەن بىرگە جۇمىس ىستەيتىن جەرگىلىكتى بيلىك پەن قۇقىق قورعاۋ ورگاندارى قىزمەتكەرلەرىنىڭ وسى مەملەكەتتىك تەگىن قىزمەت كورسەتۋلەردى ۇنەمى جۇرت جادىنا سالىپ، كوبىرەك ايتىپ ءتۇسىندىرۋ قاجەتتىگى. البەتتە، ولاي بولماعاندىقتان، كوپ رەتتە ءومىردىڭ قيىن جاعدايىنا دۋشار بولعان تۇرعىندار ۇەۇ-دەن كومەك سۇراپ جاتادى. مۇندايدا جەرگىلىكتى بيلىك پەن قۇقىق قورعاۋ ورگاندارىمەن بىرلەسە كەلە، ماڭىزدى ماسەلەنى نەعۇرلىم ءتيىمدى شەشۋگە ۇمتىلامىز، – دەيدى «اقپاراتتىق-رەسۋرستىق ورتالىق» قق جەتەكشىسى التىناي كوبەيەۆا.