وتان قورعاۋشىلار مەن جەڭىس كۇنىن مەرەكەلەۋ قارسانىڭدا، الماتى قالاسى، الماتى جانە جەتىسۋ وبلىستارى بويىنشا قاج دەپارتامەنتىندە سالتاناتتى ءىس-شارا ءوتتى.
ارداگەرلەرگە قۇرمەت كورسەتۋ قاج سالاسىندا داستۇرگە اينالعان يگى شارالاردىڭ ءبىرى. ءىس-شاراعا ارنايى سوعىسقا قاتىسۋشىلارعا تەڭەستىرىلگەن ارداگەرلەر، ەڭبەك مايدانىنىڭ قاتىسۋشىلارى، جاۋىنگەر-ينتەرناسيوناليستەرى جانە قاج ارداگەرلەرى، سونىمەن قاتار دەپارتامەنتكە قاراستى مەكەمە جانە پروباسيا باسشىلارى شاقىرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
سالتاناتتى جيىن ق ر انۇرانىمەن باستالدى. دەپارتامەنت باستىعى پوليسيا گەنەرال-مايورى قايرات دالبەكوۆ قۇتتىقتاۋ ءسوز سويلەدى. شاقىرىلعان ارداگەرلەرگە قۇرمەت كورسەتىلىپ، العىسحات پەن اقشالاي سىيلىقتار تارتۋ ەتىلدى.
سونىمەن قاتار قىزمەتتىك مىندەتتەرىن ءمىنسىز اتقارىپ، قول جەتكىزگەن جەتىستىكتەرى ءۇشىن قازاقستان رەسپۋبليكاسىنىڭ ىشكى ىستەر مينيسترلىگىنىڭ بۇيرىعىمەن ءبىر قىزمەتكەر مەرزىمىنەن بۇرىن ارنايى اتاعىن السا، ءبىر قىزمەتكەر ارناۋلى اتاعىنان ءبىر ساتى جوعارى اتاعىن الدى. “قىلمىستىق-اتقارۋ جۇيەسىن دامىتۋعا قوسقان ۇلەسى ءۇشىن” مەدالىنە ەكى قىزمەتكەر يەلەنىپ، تاعى ەكى قىزمەتكەر “قىلمىستىق-اتقارۋ جۇيەسىنىڭ ۇزدىگى” ءتوس بەلگىسىن الدى. بۇعان قوسا ءىىم العىس حاتىنا 1 قىزمەتكەر، گراموتاسىنا 5 قىزمەتكەر يە بولدى. قاج دەپارتامەنتى باستىعىنىڭ بۇيرىعىمەن 9 قىزمەتكەرلەر ماراپاتقا يە بولدى.
«قانشا جىل وتسە دە سوعىس جىلدارىندا ەلى مەن جەرىن، ۇرپاعىنىڭ بولاشاعىن قورعاعان، وتانعا بەيبىت ءومىردى تارتۋ ەتكەن، قان مايداندا وت كەشكەن ەرجۇرەك جاۋىنگەرلەردىڭ ەرلىگى ۇمىتىلمايدى. حالقىمىز ەلىنىڭ، جەرىنىڭ قورعانى بولعان باتىرلارىن ەرەكشە ارداقتاپ، قۇرمەت تۇتقان. بۇل كۇن – ەرلىك پەن باتىلدىقتىڭ ولشەۋسىز ۇلگىسى بولعان، وتتى جولدارمەن وتكەن جاۋىنگەرلەر الدىندا تاعزىم ەتەتىن كۇن. ەلىمىزدە بەيبىتشىلىك پەن تىنىشتىق ماڭگى بولسىن»، – دەپ اتاپ ءوتتى قاجد باستىعى قايرات دالبەكوۆ.
مەرەكەلىك ءىس-شارا سالتاناتتى كونسەرتتىك باعدارلامامەن جالعاستى. قىزمەتكەرلەر اسكەري اندەر ورىنداپ، ارداگەرلەر ءوز كەزەگىندە مەرەكەلىك لەبىزدەرىن ءبىلدىرىپ، جاستارعا وسيەت اقىلدارىن ايتتى.