الماتىلىق زەينەتكەر ينتەرنەت-الاياقتاردىڭ قۇربانىنا اينالعانىمەن، ءتارتىپ ساقشىلارىنىڭ جەدەل ءارى كاسىبي ارەكەتىنىڭ ناتيجەسىندە ونىڭ جوعالتقان قاراجاتى قايتارىلدى.
بۇل تۋرالى قالا تۇرعىنى الماتى قالالىق پوليسيا دەپارتامەنتىنىڭ باسشىلىعىنا جولداعان العىس حاتىندا جازعان، دەپ حابارلايدى aqshamnews.kz Polisia.kz-كە سىلتەمە جاساپ.
زەينەتكەردىڭ ايتۋىنشا، ءوزىن "قازپوشتا" قىزمەتكەرى رەتىندە تانىستىرعان بەلگىسىز بىرەۋلەر ونى الداپ، SMS-كودىن قولعا ءتۇسىرىپ، اتىنا نەسيە راسىمدەگەن. وقيعانىڭ ءمان-جايىن تۇسىنگەننەن كەيىن ول بىردەن اۋەزوۆ اۋداندىق پوليسيا باسقارماسىنا جۇگىنگەن.
- اعا تەرگەۋشى مۇقان قونىسبايەۆتىڭ ساۋاتتى نۇسقاۋلىعى مەن ارىپتەستەرىنىڭ كاسىبي جانە ۇيلەسىمدى جۇمىسىنىڭ ارقاسىندا ءىستىڭ وڭ شەشىلۋىنە قول جەتكىزىلدى. الاياقتاردىڭ ءبىرى ۇستالىپ، كەلتىرىلگەن ماتەريالدىق شىعىن تولىق وتەلدى. قازىرگى ۋاقىتتا قىلمىستىق ءىس تەرگەلىپ جاتىر. وسىنداي قيىن جاعدايدا جان-جاقتى قولداۋ كورسەتكەن، قامقورلىق تانىتقان جانە باعا جەتپەس كومەك بەرگەن پوليسيا قىزمەتكەرلەرىنە شىنايى العىسىمدى بىلدىرەمىن. ولارعا قاجىماس قايرات، زور دەنساۋلىق جانە قىزمەتتە تولاعاي تابىس تىلەيمىن، – دەپ جازدى ول ءوز حاتىندا.