الماتى پوليسياسى ۇرلانعان التىننىڭ جاسىرىلعان جەرىن تاپتى

كۇدىكتىنىڭ جەكە باسى بىردەن انىقتالدى.

الماتى پوليسياسى ۇرلانعان التىننىڭ جاسىرىلعان ورنىن تاپتى، دەپ حابارلايدى Almaty-akshamy.kz Polisia.kz-كە سىلتەمە جاساپ.

جەتىسۋ اۋداندىق پوليسيا باسقارماسىنىڭ مالىمەتىنشە، 12 تامىزعا قاراعان ءتۇنى قالاداعى بازارلاردىڭ بىرىندە التىن-كۇمىس اشەكەي بۇيىمدارىنىڭ ءىرى ۇرلىعى جاسالعان.

«ق ر قك-نىڭ 188-بابى 4-بولىگى (ۇرلىق) بويىنشا تەرگەلىپ جاتقان قىلمىستىق ءىس ماتەريالدارىنا سايكەس، قاسكوي بازاردىڭ التىن ساتاتىن قاتارىنا تۇندە كىرىپ كەتكەن. ول سەگىز ساۋدا ورنىنىڭ سورەلەرىن سىندىرىپ، وزىمەن بىرگە 100 ملن تەڭگەنىڭ اشەكەي بۇيىمدارىن الىپ كەتكەن. بۇل قىلمىستى اشۋ ماقساتىندا تەرگەۋ-جەدەل توبى قۇرىلدى. بازارداعى بەينەباقىلاۋ جۇيەلەرىنە تالداۋ جاسالدى. كۇدىكتىنىڭ جەكە باسى بىردەن انىقتالدى. بۇل – 35 جاستاعى ا. ەسىمدى ازامات. ول قونايەۆ قالاسىنداعى قوناقۇيلەردىڭ بىرىندە ۇستالدى. كۇدىكتى سول جەردە ۋاقىتتى وتكىزۋدى جوسپارلاعان كورىنەدى»، –  دەدى جەتىسۋ اۋداندىق پوليسيا باسقارماسىنىڭ باستىعى دارحان مۇسانوۆ.

قاسكويدىڭ ۇرلاعان مۇلىكتى جاسىرعان جەرى انىقتالدى. ول ۇرلانعان التىنداردى قالا شەتىندەگى ءشول دالاعا جاسىرعان. زاتتاي ايعاقتار تاركىلەندى. ق ر قپك-نىڭ 128-بابىنا (ۇستاپ الۋ نەگىزدەرى) سايكەس ا. ەسىمدى ازامات ۋاقىتشا ۇستاۋ يزولياتورىنا قامالدى. بۇلتارتپاۋ شاراسى رەتىندە سوت قاماۋعا الۋدى سانكسيالادى.