قابىلدانعان شارالار تۋرالى ءوتىنىش اۆتورلارىنا بەلگىلەنگەن مەرزىمدە حابارلانادى.
الماتى پوليسياسى تۇكىرگەن ادامداردىڭ فوتوسى مەن ۆيدەوسىن «102» قوسىمشاسى ارقىلى جىبەرۋدى سۇرايدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى پوليسياسى سيفرلىق اقپاراتتىق رەسۋرستاردى پايدالانا وتىرىپ، پوليسياعا حابارلاسۋدىڭ بالامالى تاسىلدەرىن، سونىڭ ىشىندە قازاقستان رەسپۋبليكاسى ءىىم ەنگىزگەن «102» قوسىمشاسى ارقىلى ازاماتتاردىڭ حابارلامالارىن ومنيكانالدى قابىلداۋدى ەسكە سالدى.
«اتاپ ايتقاندا، قوعامدىق ءتارتىپتى بۇزۋ جانە قوعامدىق ورىنداردى لاستاۋ تۋرالى يلليۋستراسيالاردى جىبەرۋگە شاقىرامىز. كورسەتىلگەن رەسۋرس ارقىلى تاۋلىك بويى 20 وپەراتور بەينە قوڭىراۋلار، اۋديو نەمەسە SMS-حابارلامالاردى قابىلدايدى. قابىلدانعان شارالار تۋرالى ءوتىنىش اۆتورلارىنا بەلگىلەنگەن مەرزىمدە حابارلانادى. ايتا كەتكەن ءجون، الماتىلىقتار بەلسەندىلىك تانىتىپ، زاڭدىلىق پەن ءتارتىپتى قامتاماسىز ەتۋگە ءوز ۇلەستەرىن قوسۋدا. قولجەتىمدى بايلانىس ارنالارى ارقىلى ولار ۇساق قۇقىقبۇزۋشىلىقتار تۋرالى حابار بەرەدى. جىل باسىنان بەرى «102» قوسىمشاسى ارقىلى ازاماتتار 500-گە جۋىق حابارلاما جولداعان. ەڭ ءجيى كەزدەسەتىنى – تۇكىرگەن ادامدار تۋرالى. جالپى، جىل باسىنان بەرى اتالعان قۇقىقبۇزۋشىلىق ءۇشىن ق ر اقبك-نىڭ 434-بابى 2-بولىگى بويىنشا 5 613 ادام اكىمشىلىك جاۋاپكەرشىلىككە تارتىلدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.
سپيكەردىڭ ايتۋىنشا، بيىلعى جىلدىڭ جەتى ايىندا قالانى اباتتاندىرۋ ەرەجەلەرىن بۇزۋدىڭ 17 152 دەرەگى، قوعامدىق ورىندا الكوگولدىك ىشىمدىكتەردى ءىشۋدىڭ 11 481 دەرەگى، تىنىشتىقتى بۇزۋدىڭ 5 494 دەرەگى، تەمەكى شەگۋگە تىيىم سالۋدى بۇزۋدىڭ 3 077 دەرەگى تىرەلدى، سونداي-اق 505 ۇساق قىلمىس جانە ت.ب.انىقتالدى.
الماتى قالالىق پد اكىمشىلىك زاڭناماعا سايكەس قوعامدىق ورىنداردا (اۋماقتاردا، حالىق ءۇشىن قولجەتىمدى نەمەسە اشىق نىسانداردا)، ساياباقتار مەن الاڭدارداعى بەلگىلى ءبىر ارەكەتتەر زاڭمەن شەكتەلەدى جانە جاۋاپكەرشىلىككە اكەپ سوعادى.
مىسالى، ق ر اقبك-نىڭ 434-2-بابىنىڭ تالاپتارىنا سايكەس، قوعامدىق ورىنداردى لاستاۋعا بايلانىستى ارەكەتتەردى جاساۋعا تىيىم سالىنادى. سيپاتتامالاردى ەسكەرە وتىرىپ، تۇكىرۋ قوعامدىق ورىنداردى لاستايدى، سوندىقتان بۇل ارەكەتتەر وسى قۇقىقبۇزۋشىلىقتىڭ بەلگىلەرىنە جاتادى.