“تازا قازاقستان” پروفيلاكتيكالىق ناۋقانى اياسىندا الماتى پوليسياسىنىڭ قىزمەتكەرلەرى بارلىق جەردە جەرگىلىكتى رەيدتەر وتكىزۋدە.
اتاپ ايتقاندا، قالا تۇرعىندارىنىڭ سۇيىكتى دەمالىس ورنىنا اينالعان تاۋلى جانە ورماندى ايماقتاردا، دەپ حابارلايدى aqshamnews.kz.
– وكىنىشكە قاراي، كوپ ادامدار تابيعاتتى قادىرلەپ، قورعاي بەرمەيدى. مىسالى، دەمالىستان كەيىن وزدەرىنىڭ ارتىنان قوقىس تاستاپ كەتىپ، اعاش بۇتاقتارىن سىندىرىپ، بالالارىنا جامان ۇلگى كورسەتەدى. بۇرىن بىرنەشە رەت حابارلاعانىمىزداي، قوعامدىق ورىنداردى لاستاعانى جانە قالانى اباتتاندىرۋ ەرەجەلەرىن بۇزعانى ءۇشىن جاۋاپكەرشىلىك كۇشەيتىلدى. سونىمەن قاتار پوليسەيلەر مۇددەلى قىزمەتتەرمەن بىرلەسىپ، ەكولوگيالىق رەيدتەر جۇرگىزۋدە، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
ەسكە سالا كەتەيىك، الماتى قالاسىندا قۇقىق بۇزۋشىلىققا “مۇلدەم توزبەۋشىلىك” قاعيداتىن نىعايتۋ، كوشەلەردە جانە باسقا دا قوعامدىق ورىنداردا ءتيىستى قوعامدىق ءتارتىپتى ساقتاۋ ماقساتىندا “تازا قازاقستان” پروفيلاكتيكالىق ءىس-شاراسى وتكىزىلۋدە. سونداي-اق ول، بۇزاقىلىق، مۇلىككە زيان كەلتىرۋ، ۇساق بۇزاقىلىق دەرەكتەرىن انىقتاۋعا جانە جولىن كەسۋگە باعىتتالعان. ارنايى ءموبيلدى توپتار قۇرىلىپ، ءىس-شارانى وتكىزۋگە جۇرتشىلىق بارىنشا تارتىلدى. وسى كۇندەرى ۋچاسكەلىك پوليسيا ينسپەكتورلارى تۇرعىن ءۇي الاپتارىندا، ساياباقتاردا، الاڭداردا، قوعامدىق ورىنداردا ماقساتتى جانە جەرگىلىكتى رەيدتەر جۇرگىزۋدە. وسىعان وراي، الماتى پوليسياسى قالا تۇرعىندارى مەن قوناقتارىن كەز كەلگەن قۇقىق بۇزۋشىلىققا توزبەۋشىلىك تانىتىپ، قورشاعان ورتاعا، بوتەننىڭ مۇلكىنە ۇقىپتىلىقپەن قاراۋعا جانە زاڭدى قاتاڭ ساقتاۋعا شاقىرادى.
اقپارات كوزى Polisia.kz سايتىندا: https://polisia.kz/almaty-politsiyasy-tauly-ajmaqtarda-rejd-zhurgizdi/