الماتى پوليسياسى قالا تۇرعىندارىنىڭ قوقىس لاقتىرۋ ساتتەرىنەن بەينەروليك جيناعىن ازىرلەدى، – دەپ حابارلايدى aqshamnews.kz.
بەينە جيناق پد جەدەل باسقارۋ ورتالىعىنىڭ ماتەريالدارى نەگىزىندە جاسالدى. بۇل بولىمشەنىڭ بەينەباقىلاۋ وپەراتورلارى ازاماتتار كوپ جينالاتىن جەرلەرگە، تۇرعىن ۇيلەردىڭ اۋلالارى مەن كوزگە تۇسپەي قالاتىن، ادام كوپ جينالمايتىن ورىندارعا دا ورناتىلعان كامەرالاردى تاۋلىك بويى قاداعالايدى.
– كوپتەگەن ازاماتتار كامەراعا كورىنبەي قالامىز دەپ ويلايدى. ولار قاعازدى نەمەسە تەمەكى تۇقىلىن لاقتىرعان كەزدە وزدەرىن ەشكىم بايقامايتىنداي كورەدى. ءبىراق ءىس جۇزىندە تەرىس ارەكەتتەرى بەينەجازباعا ءتۇسىپ قالادى جانە بەينەجازبا ۋچاسكەلىك ينسپەكتورعا نەمەسە پاترۋلدىك پوليسيا ەكيپاجىنا جىبەرىلەدى. ءارقايسىمىز اتسالىسىپ، سالاۋاتتى، زاڭعا باعىناتىن، ءپرينسيپشىل ۇرپاق تاربيەلەۋگە ۇلەس قوسىپ، سول ارقىلى “تازا قازاقستان” ناۋقانىنىڭ جۇزەگە اسۋىنا ءوز ۇلەسىمىزدى قوسا الامىز، – دەيدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
قوقىس تاستاپ كەتكەن الماتىلىقتارعا ايىپپۇل سالىناتىنى بۇعان دەيىن حابارلانعان بولاتىن. الماتىدا اباتتاندىرۋ سالاسىنداعى زاڭ بۇزۋشىلىقتارمەن كۇرەسۋ شارالارى كۇشەيتىلدى.
ەكولوگيا جانە قورشاعان ورتانى قورعاۋ باسقارماسى قالالىق پوليسيا دەپارتامەنتىمەن بىرلەسىپ، ءتارتىپ بۇزۋشىلاردى انىقتاۋعا باعىتتالعان بىرلەسكەن رەيدتەر جۇرگىزىپ جاتىر. سونىمەن قاتار ءتارتىپ ساقشىلارى ستيحيالىق ورىنداردا رۇقساتسىز سىرتقى جارنامانى ورنالاستىرۋ جاعدايلارىنا باسا نازار اۋدارادى.