الماتى پوليسياسى كۇشەيتىلگەن جۇمىس رەجيمىنە ءوتتى، – دەپ حابارلايدى Polisia.kz.
قازاقستان رەسپۋبليكاسىنىڭ تاۋەلسىزدىك كۇنىن مەرەكەلەۋ كەزىندە قوعامدىق ءتارتىپتى قامتاماسىز ەتۋ، قىلمىستاردىڭ، سونداي-اق باسقا دا زاڭسىز ارەكەتتەردىڭ دەر كەزىندە الدىن الۋ جانە جولىن كەسۋ ماقساتىندا الماتى پوليسياسى كۇشەيتىلگەن قىزمەت تۇرىنە كوشىرىلدى.
وسىعان وراي، پد-نىڭ باسشىسى ارىستانعاني زاپپاروۆ الماتى گارنيزونىنىڭ ءبىرىڭعاي ساپتۇزەۋىن جۇرگىزدى.
– تاۋەلسىزدىك كۇنى – وراسان زور كۇش-جىگەردىڭ ارقاسىندا وسى ماڭگىلىك قۇندىلىققا قول جەتكىزگەن كوپتەگەن ۇرپاقتارعا كورسەتىلگەن قۇرمەت. ءبىزدىڭ الدىمىزدا قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ماڭىزدى مىندەتى تۇر. بۇل ءبىزدىڭ كونستيتۋسيالىق جانە كاسىبي پارىزىمىز، ال ونى جوعارى ۇيىمداستىرۋشىلىقپەن جانە ساپالى دەڭگەيدە ورىنداۋ – دەپارتامەنت ورگاندارى مەن بولىمشەلەرىنىڭ بارلىق قىزمەتكەرلەرىنىڭ ابىرويلى مىندەتى. ءاربىر پوليسيا قىزمەتكەرى قىلمىسپەن جانە قۇقىق بۇزۋشىلىقپەن كۇرەس زاڭدىلىقتى قاتاڭ ساقتاۋعا نەگىزدەلگەنىن ەستە ۇستاۋى كەرەك. مەملەكەتتىلىك بىزگە بولاشاققا باتىلدىقپەن قاراۋعا، بولاشاعىمىزدى ايقىن كورۋگە مۇمكىندىك بەردى، – دەدى، الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
سونداي-اق الماتى پوليسياسىنىڭ باسشىسى پوليسيا جۇمىسىنىڭ ساپاسىن ارتتىرۋعا كومەكتەسەتىن ىشكى ىستەر مينيسترلىگىنىڭ قىزمەتتىڭ سەرۆيستىك مودەلىنە كوشۋ جونىندەگى باسىم تۇجىرىمدامالارىنىڭ ءبىرىن جۇزەگە اسىرۋعا ەرەكشە نازار اۋداردى.
– قالاداعى ءتارتىپ پەن ازاماتتاردىڭ اماندىعى پوليسيانىڭ قالاي جۇمىس ىستەيتىنىنە بايلانىستى. ءتارتىپ ساقشىلارىنىڭ قوعاممەن تىعىز بايلانىستا بولۋى وتە ماڭىزدى. ال ماتەريالدىق-تەحنيكالىق بازا مەن مەملەكەتتىك الەۋمەتتىك قولداۋ ولاردىڭ وقيعالاردان قالىسپاي، قىلمىسقا قارسى تۇرۋىنا مۇمكىندىك بەرەدى. مەرەكە قارساڭىندا جەكە قۇرامعا زور دەنساۋلىق، باقىت، وتباسىلىق اماندىق جانە زاڭدىلىق پەن قۇقىق ءتارتىبىن قامتاماسىز ەتۋ جانە قىلمىسقا قارسى كۇرەستە سارقىلماس كۇش-قۋات تىلەيمىن، – دەدى ارىستانعاني زاپپاروۆ.
ساپتىق تەكسەرۋ بارىسىندا الدىڭعى ساپتاعى بولىمشە قىزمەتكەرلەرىنىڭ كيىم-كەشەكتەرى، كولىكتەردىڭ جاعدايى، تەحنيكالىق جابدىقتارى تەكسەرىلدى.
سونىمەن قاتار قالاداعى قوعامدىق ءتارتىپتى قورعاۋدى كۇن سايىن قولعا الاتىن پاترۋلدىك پوليسيا پولكىنىڭ، مامانداندىرىلعان باتالوننىڭ جاساقتارى، ۋچاسكەلىك ينسپەكتورلار، جقاج قىزمەتكەرلەرى، ۇلتتىق ۇلان ساربازدارى كومانديرلەردىڭ باعىت-باعدارى مەن نۇسقاۋلارىن تىڭدادى.
ال، قىزمەتىندە جوعارى كورسەتكىشتەرگە قول جەتكىزگەن، ءوز ءىسىنىڭ كاسىبي مامانى دەپ تانىلعان پوليسيا قىزمەتكەرلەرىن تاۋەلسىزدىك كۇنى مەرەكەسىنە وراي پوليسيا دەپارتامەنتى باسشىلىعى ماراپاتتادى.