وتكەن دەمالىس كۇندەرى عانا قالا جولدارىندا 1200 قۇقىق بۇزۋشىلىق انىقتالدى.
قازاقستان رەسپۋبليكاسىنىڭ جول قوزعالىسى ەرەجەلەرىن ساقتاۋ جانە بۇزۋشىلىقتاردىڭ الدىن الۋ ماقساتىندا الماتىدا پاترۋلدىك پوليسيا پولكىنىڭ جانە مامانداندىرىلعان باتالونىنىڭ قىزمەتكەرلەرى اۋقىمدى جانە جەرگىلىكتى ءىس-شارالار وتكىزىپ جاتىر، دەپ حابارلايدى aqshamnews.kz Polisia.kz-كە سىلتەمە جاساپ.
"ءتارتىپ بۇزۋشىلاردى انىقتاۋ – ءبىزدىڭ باقىلاۋىمىزدا. جىل باسىنان بەرى قاراما-قارسى جولاققا شىعىپ كەتكەنى ءۇشىن – 690، جالعان مەملەكەتتىك تىركەۋ ءنومىرى بار كولىك قۇرالىن باسقارعانى ءۇشىن – 254، مەملەكەتتىك ءنومىرى جوق كولىكتى باسقارعانى ءۇشىن – 991، كولىك قۇرالىن ماس كۇيىندە باسقارعانى ءۇشىن – 1540، كولىك قۇرالىن جۇرگىزۋشى كۋالىگىنسىز باسقارعانى ءۇشىن – 3971، اپاتتىق جاعداي تۋعىزعانى ءۇشىن 6848 جۇرگىزۋشى جاۋاپقا تارتىلدى"، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
وسىعان بايلانىستى، قالا پوليسەيلەرى جول قوزعالىسىنا قاتىسۋشىلاردى جول قوزعالىسى ەرەجەلەرىن قاتاڭ ساقتاۋعا شاقىرىپ، “جازانىڭ بۇلتارتپاستىعى” قاعيداسىن ەسكە سالدى
"كۇن جىلىسىمەن كولىكتى قاتتى جۇرگىزۋگە قۇمار جۇرگىزۋشىلەر كوبەيەدى. سايكەسىنشە جول ەرەجەسى بۇزىلادى. جاستار ءقاۋىپ تۋدىرىپ، قالا كوشەلەرىمەن جارىس ۇيىمداستىرادى. سونىمەن قاتار ولار كولىكتەرىن تۇرلەندىرىپ، تىيىم سالىنعان جابدىقتى، ونىڭ ىشىندە قاتتى دىبىس شىعاراتىن رەزوناتورلاردى ورناتادى. بۇل قالا تۇرعىندارىنىڭ ءادىل سىنىنا سەبەپ بولۋدا. وسىنداي دەرەكتەردىڭ جولىن كەسۋ ماقساتىندا الدىڭعى شەپتەگى پوليسيا بولىمشەلەرى اپتا سايىن رەيدتەر جۇرگىزەدى. بۇل جۇمىس ءالى دە جالعاسىن تابادى. بۇل شارالار جولدارداعى قاۋىپسىزدىك دەڭگەيىن ارتتىرۋعا باعىتتالعان"، – دەدى شۋمايەۆ.