وتكەن جىلى الماتى قالاسىندا 6 785 جول-كولىك وقيعاسى تىركەلىپ، ونىڭ سالدارىنان 105 ادام قازا تاۋىپ، 7 370 ادام ءتۇرلى جاراقاتتار الدى.
جول-كولىك وقيعالارىنىڭ كوپشىلىگى تەك ورەسكەل ەرەجەلەردى بۇزۋ عانا ەمەس، كەيبىر جۇرگىزۋشىلەردىڭ الەۋمەتتىك جەلىلەردە ءوزىن كورسەتۋ ماقساتىندا زاڭسىز ارەكەت ەتۋى سالدارىنان دا ورىن الۋدا، دەپ حابارلايدى aqshamnews.kz Polisia.kz-كە سىلتەمە جاساپ.
– قۇرمەتتى جۇرگىزۋشىلەر مەن جول قوزعالىسىنا قاتىسۋشىلار! ىشكى ىستەر مينيسترلىگى قوعامدا «زاڭ جانە ءتارتىپ» قاعيداتىن نىعايتۋ جانە جولدارداعى قاۋىپسىزدىكتى قامتاماسىز ەتۋ جۇمىسىن بەلسەندى تۇردە جالعاستىرۋدا. سوڭعى كەزدەرى كولىك جۇرگىزۋشىلەرىنىڭ الەۋمەتتىك جەلىلەردە حايپ جاساپ، وزدەرىنە نازار اۋدارتۋ ءۇشىن جول ەرەجەسىن ادەيى بۇزۋ جاعدايلارى ءجيى كەزدەسۋدە. بۇل ىس-ارەكەتتەر تەك ءوز قاۋىپسىزدىگىڭىزگە عانا ەمەس، سونىمەن قاتار بارلىق جول قوزعالىسىنا قاتىسۋشىلار ءۇشىن ۇلكەن ءقاۋىپ تۋدىرادى. جول ەرەجەسىن بۇزۋ ءازىل ەمەس ەكەنىن ۇمىتپاڭىزدار. مۇنداي ارەكەتتەر ءۇشىن اكىمشىلىك جاۋاپكەرشىلىك قاراستىرىلعان جانە بارلىق قۇقىق بۇزۋشىلار زاڭ الدىندا جاۋاپ بەرەدى. جول قاۋىپسىزدىگى – ءبىزدىڭ ورتاق مىندەتىمىز! بارلىعىمىز جولىمىزدى ءقاۋىپسىز ەتۋگە اتسالىسايىق! ءوزىڭىزدى جانە وزگەلەردى ابايلاپ ءجۇرىڭىز، – دەپ اتاپ ءوتتى الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.