الماتى پوليسياسى الاياقتىققا جول بەرمەۋ ءۇشىن ينتەرنەت-پلاتفورمالاردىڭ اكىمشىلەرىنە بيومەتريكا مەن قوسارلانعان اۋتەنتيفيكاسيانى ۇسىندى
بۇل يدەيانى الماتى پوليسياسىنىڭ باسشىسى ارىستانعاني زاپپاروۆ حالىق الدىنداعى ءداستۇرلى ەسەپ بەرۋ كەزدەسۋىندە ايتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇعان پاندەميا كەزىندە بارلىعىنىڭ ۇيدەن شىقپاي ءومىر ءسۇرۋ سالتىنا اۋىسۋى، ەل بويىنشا شەكتەۋ شارالارىنىڭ كۇشىنە ەنۋى، ازاماتتاردىڭ ۇيدە بولۋى اسەر ەتتى، وسىعان بايلانىستى ادامدار ينتەرنەت-ساۋدا، جەتكىزۋ جانە باسقا دا قارجىلىق قىزمەتتەرگە ونلاين رەجيمىندە جۇگىنۋگە ءماجبۇر بولدى. وسىنداي وقيعالاردى ەسكەرە وتىرىپ، قاسكويلەر دە بەيىمدەلىپ، الاياقتىق جاساۋدىڭ كونتاكتىلى ادىسىنەن كونتاكتىسىز ادىسكە كوشتى. جالپى العاندا، ءابسوليۋتتى ساندار تۇرىندە بىلاي كورىنەدى، ەگەر 5 جىل بۇرىن جالپى شىعىن 1،7 ملن تەڭگە بولسا، ءقازىر 3 ملرد تەڭگەگە جەتتى»، – دەدى ارىستانعاني زاپپاروۆ.
ول سونىمەن قاتار پوليسيا جەتەكشى ينتەرنەت-رەسۋرستاردىڭ وكىلدەرىمەن جۇمىس كەزدەسۋىن وتكىزگەنىن ايتتى. وندا اقپاراتتىق جانە ەكونوميكالىق قاۋىپسىزدىك كريتەرييلەرىن وزگەرتۋ ۇسىنىلدى جانە بيومەتريا – ادام بەينەسىن تانۋ، قوسارلى اۋتەنتيفيكاسيا سياقتى شارالاردى ەنگىزۋ ايتىلدى.
«ءبىز ءوز قىزمەتىمىزدە ينتەرنەتتەگى زاڭسىز ماتەريالداردى انىقتاۋ جانە بۇعاتتاۋ بويىنشا جۇمىستى جۇيەلەندىرۋ جانە وڭتايلاندىرۋعا ارنالعان “كيبەرقاداعالاۋ” اقپاراتتىق باعدارلاماسىنىڭ مۇمكىندىكتەرىن دە پايدالانامىز. قاراپايىم سوزبەن ايتقاندا، بۇل باعدارلاما زاڭسىز مازمۇندىق بەلگىلەرى بار سايتتارعا سىلتەمەلەردى اۆتوماتتى تۇردە باعىتتاۋعا مۇمكىندىك بەرەدى. ءبىز، بۇكىل ەل بويىنشا بۇعاتتالعان نەمەسە قولجەتىمدىلىگى شەكتەۋلى 1 مىڭ 400-دەن استام سىلتەمەلەر مەن سايتتاردى انىقتادىق جانە باعىتتادىق. كەشەندى جۇمىستىڭ ناتيجەسى ءوز الدىمىزدا. ءبىز ينتەرنەت-الاياقتىقتى تىركەۋدى 32،8%-عا قىسقارتۋعا قول جەتكىزدىك»، – دەدى الماتى قالاسىنىڭ باس پوليسەيى.
كيبەرقىلمىسپەن كۇرەستىڭ تيىمدىلىگىن ارتتىرۋ ماقساتىندا ىشكى ىستەر مينيسترلىگىنىڭ باستاماسىمەن وتكەن جىلى ءىىم الماتى اكادەمياسىندا “كيبەرورتالىق” قۇرىلىپ، ونىڭ قىزمەتكەرلەرى جاڭا قاۋىپسىزدىك باعدارلامالارىن ازىرلەۋدە جانە ينتەرنەت ورتاسىن زەرتتەپ، جەلىدەگى زاڭسىز رەسۋرستارعا كىرۋدى جىلدام بلوكتاۋ جانە الدىن الۋ جولدارىن ۇيرەنىپ جاتىر.