الماتى پوليسياسى ءىرى ەسىرتكى زەرتحاناسىن جويدى. 

الماتىدا ەسىرتكى زەرتحاناسى جويىلدى، – دەپ حابارلايدى aqshamnews.kz. ول قالانىڭ مەدەۋ اۋدانىندا جەكە سەكتوردا ورنالاسقان.

– ارنايى ءىس-شارا قالالىق پروكۋراتۋرانىڭ ۇيلەستىرۋىمەن جۇرگىزىلدى. جالدامالى ۇيدە سينتەتيكالىق ەسىرتكى ءوندىرۋدى ۇيىمداستىرعان 35 جاستاعى الماتى وبلىسىنىڭ تۇرعىنى ۇستالدى. ءتىنتۋ كەزىندە ۇنتاقتى زاتتار سالىنعان ونداعان پوليەتيلەن بايلامدار، بەلگىلى ءبىر ءيىسى بار كولەمدى كانيسترلەرگە سالىنعان شيكىزات، سورعىشى جانە گوفرى بار 1،80*1،20 ولشەمدى مونشا، ىشىندە رەاگەنتتەردى، شەلەكتەردى، قاباتى بار پلاستماسسانى ارالاستىرۋعا بەيىمدەلگەن 150 ليترلىك پلاستيكالىق بوشكە، تارازىلار جانە باسقا دا زەرتحانالىق جابدىقتار انىقتالدى جانە پروسەسسۋالدىق تۇردە تاركىلەندى. سوت-حيميالىق ساراپتاماسىنىڭ مالىمەتتەرى بويىنشا، ۇنتاقتى زات – مەفەدرون، سالماعى 21 كەلى 773 گرامم، – دەدى الماتى قالالىق پوليسيا دەپارتامەنتى باستىعىنىڭ ءبىرىنشى ورىنباسارى قۋاتبەك ناۋاتوۆ.

اتالعان دەرەك بويىنشا مەدەۋ اۋداندىق پوليسيا باسقارماسى سوتقا دەيىنگى تەرگەۋ امالدارىن باستادى. ەسىرتكى زەرتحاناسىنىڭ مامانى قاماۋعا الىندى. الماتى قالاسىن “سينتەتيكا” ءوندىرىسى ءۇشىن شيكىزاتپەن قامتاماسىز ەتۋ ارناسى انىقتالۋدا.