الماتى پوليسياسىنىڭ مالىمەتىنشە، الاياقتار كوبىنەسە كەلەسى قىلمىستىق تىزبەكتەردى پايدالانادى:
– بانكتىك قاۋىپسىزدىك قىزمەتىنىڭ قوڭىراۋى: الاياقتار ءسىزدىڭ شوتىڭىزداعى كۇدىكتى ترانزاكسيالار تۋرالى حابارلايدى جانە شوتتاردى قورعاۋ ءۇشىن شوتىڭىزدان اۋدارىمدار جاساۋ كەرەك دەپ سەندىرەدى.
– ۇلتتىق قاۋىپسىزدىك كوميتەتىنەن جانە باسقا دا قۇقىق قورعاۋ ورگاندارىنان قوڭىراۋ شالۋ: الاياقتار ءقاۋىپتى الاياقتى ۇستاۋ بويىنشا ارنايى ءىس-شارا جۇرگىزىلىپ جاتقانىن حابارلايدى جانە ءسىزدىڭ شوتىڭىزداعى قاراجاتتىڭ جوعالۋىنا اكەلەتىن ارەكەتتەردى جاساۋعا كوندىرەدى.
– ۇيالى بايلانىس وپەراتورىنان قوڭىراۋ شالۋ: الاياقتار وزدەرىن ۇيالى بايلانىس وپەراتورلارىنىڭ قىزمەتكەرلەرىمىز دەپ تانىستىرىپ، سيم-كارتاڭىزدىڭ مەرزىمى اياقتالۋعا جاقىن دەپ حابارلايدى. كەلىسىمشارتتى جاڭارتۋ ءۇشىن ولار ءسىزدى تەلەفونىڭىزعا جىبەرىلەتىن سمس-كودتارىن ايتۋدى سۇرايدى.
– بروكەرلەردىڭ قوڭىراۋى: الاياقتار ايىنا 50 پايىزدان استام كىرىستىلىكپەن كريپتوۆاليۋتاعا، التىنعا، اكسيالارعا پايدالى ينۆەستيسيا جاساۋدى ۇسىنادى. ينۆەستيسيانى العاننان كەيىن قاسكويلەر قۇرباندى بارلىق الەۋمەتتىك جەلىلەردە جانە مەسسەندجەرلەردە بۇعاتتايدى.
– جوق ءونىمدى نەمەسە قىزمەتتى ساتۋ: الاياقتار الەۋمەتتىك جەلىلەردە جانە ينتەرنەت-پلاتفورمالاردا ءونىمدى نەمەسە قىزمەتتى ساتۋ تۋرالى جارنامانى ورنالاستىرادى. تولەمدى العاننان كەيىن ولار جوعالادى.
– باسشىدان كەلەتىن حابارلاما: الاياقتار مەملەكەتتىك ورگانداردىڭ نەمەسە جەكە ۇيىمداردىڭ جوعارى لاۋازىمدى باسشىلارىنىڭ اتىنان Whatsapp مەسسەندجەرىندە اككاۋنت اشىپ، ونىڭ اشىق دەرەككوزدەردەن الىنعان سۋرەتىن وزدەرىنىڭ اۆاتارىنا سالىپ، سوسىن قول استىنداعىلارعا ءتۇرلى سىلتاۋلارمەن جەدەل تۇردە ءۇشىنشى ادامداردىڭ ءارتۇرلى شوتتارىنا اقشا قاراجاتىن جىبەرۋ قاجەتتىگى تۋرالى جازادى. بارلىق جاعدايدا الماتى پوليسياسى اڭگىمەنى دەرەۋ توقتاتىپ، بۇل دەرەكتى بانككە جانە اۋماقتىق قۇقىق قورعاۋ ورگاندارىنا حابارلاۋدى قاتاڭ تۇردە ۇسىنادى.