ءتارتىپ ساقشىلارى دابىل قاعۋدا.
پوليسەيلەردىڭ ايتۋىنشا، ەسىرتكى قىلمىسىنا جاستار كوبىرەك تارتىلۋدا. ولاردىڭ كوپشىلىگى ەسىرتكىنى قولدانۋ مەن تاراتۋدىڭ سالدارى تۋرالى ويلانبايدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«اتاپ ايتقاندا، ەسىرتكى ساتىلاتىن سايتتاردىڭ مەكەنجايلارى كورسەتىلگەن ترافارەتتىك جارنامانى قولدانۋ ارقىلى اقشا تابۋعا تىرىساتىندار تۋرالى، سونداي-اق ەسىرتكىنى جاسىرىن جەرگە قويىپ كەتۋ زاڭ بويىنشا جازالانبايدى دەپ ويلايتىندار جايىندا بولىپ وتىر. بۇل ەكەۋىنىڭ دە قىلمىس ەكەنىن جانە قىلمىستىق كودەكستىڭ نورمالارىمەن رەتتەلەتىنىن جاۋاپكەرشىلىكپەن مالىمدەيمىن. ەسىرتكى جانە پسيحوتروپتىق زاتتاردى جارنامالاعانى ءۇشىن زاڭ شىعارۋشى 6 جىلعا دەيىن باس بوستاندىعىنان ايىرۋ تۇرىندەگى جازانى، ال ەسىرتكىنى جاسىرىن جەرگە قويىپ كەتكەندىگى ءۇشىن 15 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جاۋاپكەرشىلىكتى قاراستىرادى. ءوز بولاشاعىڭىزدى قۇرتپاڭىز! بىرەۋدىڭ تاعدىرىن تالقانداۋعا ۇلەس قوسپاڭىزدار!»– دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.