الماتىعا ەسىرتكى جەتكىزۋ ارناسى انىقتالدى.
الماتى پوليسياسى ەسىرتكى ساتۋشىلاردىڭ قىلمىستىق توبىن جويدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ەسىرتكى قىلمىسىنا قارسى كۇرەس ءبولىمىنىڭ حابارلاۋىنشا، پوليسيانىڭ ارنايى جاساقتارىنىڭ كومەگىمەن جۇرگىزىلگەن ارنايى ءىس-شارا بارىسىندا بەس ەر ادام ۇستالدى. ولاردىڭ بارلىعى دا جامبىل وبلىسى، شۋ اۋدانىنىڭ تۋمالارى.
«كۇدىكتىلەر قالانىڭ ءار جەرىندە ۇستالدى. ماسەلەن، "قالقامان" شاعىناۋدانىندا 46 جاستاعى ا. ەسىمدى ازامات قۇرىقتالدى. رۇقسات ەتىلگەن ءتىنتۋ كەزىندە ودان سىعىمدالعان گاشيش زاتى سالىنعان ءتورت بۋما، 1 ملن 150 مىڭ تەڭگە كولەمىندەگى قولما-قول اقشا جانە ءىىو زەينەتكەرىنىڭ جالعان كۋالىگى تابىلدى جانە تاركىلەندى. ال كۇدىكتىنىڭ ۇيىنەن، ءۇيدىڭ قازاندىعىنان جالپى سالماعى 4 كەلىدەن اساتىن گاشيش ەسىرتكى زاتى سالىنعان 7 پوليەتيلەن بۋماسى مەن مەتالل تارازىلار تابىلدى. ءدال سونداي جالعان قۇجات توپتىڭ تاعى ءبىر مۇشەسىنەن – 40 جاستاعى و. ەسىمدى ازاماتتان تاركىلەندى. ارنايى ءىس-شارا ناتيجەسىندە زاڭسىز اينالىمنان جالپى سالماعى 34 كەلىگە جۋىق گاشيش تاركىلەندى. كۇدىكتىلەر قاماۋعا الىندى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
پوليسەيلەردىڭ ايتۋىنشا، الماتىعا ەسىرتكى جەتكىزۋ ارناسى انىقتالدى. قازىرگى ۋاقىتتا ءشوپتى الەۋەتتى پايدالانۋشىلاردىڭ اۋقىمى تەكسەرىلىپ جاتىر. سونىمەن قاتار الماتى قالالىق پد، ق ر قپك-نىڭ 201-بابىنىڭ تالاپتارىنا، سونداي-اق ق ر كونستيتۋسياسىنىڭ نورمالارىنا سايكەس، قىلمىستىق ءىس بويىنشا وزگە دە مالىمەتتەر جاريا ەتۋگە جاتپايتىنىن حابارلايدى.