الماتى پوليسياسى ەسىرتكى سايتتارىن جارنامالاعان «سۋرەتشىلەردى» ۇستادى

پوليسەيلەردىڭ مالىمەتىنشە، كۇدىكتىلەر قالانىڭ المالى اۋدانىندا ۇستالعان.

تەكسەرۋ بارىسىندا ولاردىڭ بىرىنەن ەسىرتكى ساتىلاتىن سايتتاردىڭ مەكەنجايلارى جازىلعان ترافارەتتەر مەن بوياۋلار سالىنعان بايلام تاركىلەندى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«24 جاستاعى چ. ەسىمدى ازامات وسىعان دەيىن قاراقشىلىق جاساعانى ءۇشىن سوتتالعان. جاس جىگىت تاعى دا زاڭدى بۇزدى. “سۋرەتشىگە” سەرىكتەس تابۋ قيىنعا سوقپادى. ول ەش جەردە جۇمىس ىستەمەيتىن 32 جاستاعى ي. ەسىمدى ازاماتتى تاپتى. سونىمەن قاتار، ەكى ايىپتالۋشى دا ەسىرتكى زاتتارىن پايدالانعان، سول ارقىلى دوستاسقان. كۇدىكتىلەردىڭ ايتۋىنشا، ولار بۇل ىسپەن اينالىسىپ جۇرگەندەرىنە بىرنەشە اي عانا بولعان. ال قابىرعاداعى ءبىر ءمور ءۇشىن تولەم شامامەن 2-3 مىڭ تەڭگە بولادى. كۇدىكتىلەردىڭ ارەكەتتەرى ق ر قك-نىڭ 299-بابى 1-بولىگى بويىنشا سارالانادى. زاڭنامادا ءۇش جىلعا دەيىن باس بوستاندىعىنان ايىرۋ تۇرىندەگى جازا قاراستىرىلعان»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.