الماتى پوليسياسى قوعامدىق كولىكتەردى تەكسەرۋدە.
الماتى قالاسىنىڭ پوليسيا دەپارتامەنتى 10-16 ماۋسىم ارالىعىندا “قوعامدىق كولىك” جەدەل-الدىن الۋ ءىس-شاراسىن جۇرگىزىپ جاتىر، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇل ءىس-شارا كولىك قۇرالىمەن جولاۋشىلار مەن جۇكتى تاسىمالدايتىن جۇرگىزۋشىلەردىڭ كولىك جانە ەڭبەك ءتارتىبىن ارتتىرۋعا، تەحنيكالىق اقاۋى بار نەمەسە قايتا جابدىقتالعان جولاۋشىلار كولىگىن پايدالانۋ دەرەكتەرىن انىقتاۋعا، سونداي-اق زاڭسىز جولاۋشىلار تاسىمالىنىڭ جولىن كەسۋگە باعىتتالعان.
– بىرىنشىدەن، قوعامدىق كولىك جۇرگىزۋشىلەرىنە ۇندەۋ تاستاپ، جول قوزعالىسى ەرەجەلەرىن قاتاڭ ساقتاۋدى، جولاۋشىلارعا سىپايى جانە دۇرىس قاراۋدى ەسكەرتەمىز. سىزگە ادامداردىڭ ءومىرى سەنىپ تاپسىرىلعانىن جانە ولاردىڭ ءقاۋىپسىز، ىڭعايلى قوزعالىسىن قامتاماسىز ەتۋگە مىندەتتى ەكەنىڭىزدى ەستە ساقتاڭىز. سونىمەن قاتار ۇبت-عا، ەكسكۋرسياعا جانە تۋريستىك ساپارلارعا بالالاردى تاسىمالداۋ كەزىندە ۇيىمداسقان توپتاردى تاسىمالداۋ ەرەجەلەرىنىڭ تالاپتارىن ساقتاۋ قاجەتتىگىن ەسكە سالامىز. بالالاردى كولىكتە تاسىمالداۋ كەزىندە ولاردى ۇستايتىن قۇرالداردى جانە اۆتوكولىك ورىندىقتارىن پايدالانۋ قاجەت، – دەدى الماتى قالالىق پد اكىمشىلىك پوليسيا باسقارماسىنىڭ باستىعى اسحات قۇلبايەۆ.
سونداي-اق سپيكەر كولىكتىڭ كەز كەلگەن ءتۇرىن باسقارعان كەزدە جان-جاققا الاڭداماۋ جانە تەلەفوندى قولدانباۋ كەرەكتىگىن ەسكە سالدى. بۇل جول-كولىك وقيعالارىن بولدىرماۋعا مۇمكىندىك بەرەتىنىن ايتتى.